Tualthattua puh Roliana thia chhar a ni

Rokimi (51) leh a tupa Mark Lalawmpuia (7), Mamit Luangpawl Veng te thattua puh Rokimi pasal Roliana @ Liantea (36) chu December 10, Inrinni tlai dar 5:50 vel khan thia hmuh a ni. Rokimi leh Mark Lalawmpuiate hi December 7, 2022 zingah khan an chenna inah hrepuia chehhlum an ni a; Liantea hi hemi ni aṭang hian a tlanbo a ni.

Mamit aṭanga Vanglaini thudawn danin, Liantea hian December 10 zing dar 6 vel khan Mausen rama thlamah a mu lai, thlam neitute hnathawk ṭhinin a hmu a, a man ngam lo. Thlam neitu hriattirin, ani hian Luangpawl YMA hruaitute a hriattir ve nghal a, man tuma hmalak chhunzawm a ni.

December 10 hian Luangpawl Vengin mitthi an neih avangin Mamit Sub-Headquarters YMA hruaitute be rawn chungin SYMA SEC chin leh Luangpawl Branch YMA hruaitute chuan chawhnu lam khan Mausen ram chhunga huan thlam awm ang ang chu hual a ni.

Hmun hrang hrangah insem darhin Rodingluaia huana thlam thlithlaitute chuan thim hlimah Liantea hi thlam chhungah awm an awm ngei tih an hria a, an hual a ni. Hnaih chilhin YMA hruaitu an nih thu leh engtin mah an tihnat loh tur thu sawiin, inpe mai turin an thlem a ni.

Liantea hian a chemte chuhin a thin hnunah a tin a, invit lo tura an ngen chung pawhin a chemte chu a bawh tlum ta a ni.

Liantea hmuh a nih thu leh amah a intihhlum thu hi Mamit police hriattir nghal an ni a, police lamin thil ṭul ang ang an buaipui hnuin Inrinni zan dar 9:30 vel khan Liantea ruang hi Mamit District Hospital ruang dahna hmunah dah luh a ni.

Postmortem a nih hnuin nimin khan Luangpawl Veng thlanmualah vui liam a ni. Liantea thih dan chungchangah hian Mamit Police Station-ah thih dan pangngaia thi ni lo thubuai (unnatural death) ziah luh a ni.