Aizawla I-Day lawm dan tur relah thu a inhmu lo July 15 - 'Parade tur'; July 29 - 'Parade loh tur'

Kumina Independence Day lawm dan tur Aizawl DC hoa July 15, 2020-a an rêlah, parade turin sikul 14 thlan niin, sikul 14 hnenah parade tura hriattirna an thawn vek hman a. July 28-a GAD lehkhaah erawh chuan sikul naupang tel loa force mite parade tura tih a ni thung a; July 29-a Aizawl DC hoa I Day chungchang ngaihtuaha ṭhukhawm chuan sikul naupang parade chang ni loin parade hrim hrim awm lo turin an rel.

Sorkar laipuiin state leh union territory tin chief secretary hnena hriattirna a thawnah, I-Day lawmnaah sikul naupangte parade-ah teltir loh tura tih a ni a; General Administration department (GAD)-in July 28, 2020-a hriattirna a chhuahah pawh I-Day lawmnaah sikul naupangte parade-ah telh loh tur a nih thu, district tina DC-te hriattir a ni.

GAD-in hriattirna a tihchhuah tûk, July 29-ah Aizawl DC R Lalramnghaka hoin DC conference hall-ah Aizawla I-Day lawm dan tur rèl leh a ni a, sikul naupangte chauh ni loin, parade hrim hrim awm lo tura rèl a ni. DC chuan July 29 khan Press Note siam nghalin, I-Day lawmnaah parade a awm loh tur thu leh sorkar hnathawkah pawh joint secretary chin chung lam chiah tel tur a nih thu a tarlang.

July 29, Nilainia Aizawl DC-in Press Note a siamah chuan, "Mizoram sorkar chuan kumin 2020 Independence Day lawmna programme chu, Covid-19 hripui lêng avangin kum danga lawm ṭhin dan anga lawm theih a nih dawn loh thu leh, parade neih ṭhina sikul naupang tel ṭhinte pawh an tel a rem dawn loh thu te, he ni lawmna programme hman dan tura kaihhruainate nen, lehkha No. F. 20016/4/2012-GAD dated 28.7.2020 hmangin DC zawng zawng a hriattir a. He hriattirna zawm tur hian district tina DC leh an thawhpuite pawhin programme an duang chho mek a ni.

"Hetih lai hian, vawiin dt. 29.07.2020 hian Aizawla chhuak ni tin chanchinbu ṭhenkhatah Independence Day lawmna programme-ah sikul naupangte tel tur anga thuchhuah a lo awm tih leh, mipui lam pawh he thu hian a tithlabar hle tihte hriat a ni a. A pawi hle a ni," tiin ziah a ni. Aizawl DC Press Note chu mipuiin I-Day 2020 lawmna programme chungchangah thu chiang zawk an hriat nan siam a nih thu tarlan a ni a; July 29 vêka sorkar thuchhuahah pawh, "Aizawl Bawrhsap chuan pawi a ti hle a, sikul naupang nu leh pa, chhungte thlabár lo turin a ngen a ni," tih a ni bawk.

Hetih lai hian, Aizawl DC hmasa Vanlalngaihsaka hoa July 15, 2020-a I-Day hman dan tur rêla meeting minute-a a lan danin, Aizawla I-Day lawmnaah parade contingent 23 awm tura tih a ni. Parade tura tih zingah sikul 14 an tel a; a dangte chu - 46 Assam Rifles, BSF, 1st MAP, 3rd MAP leh MRHG aṭangin contingent pakhat ṭheuh, NCC leh Scouts & Guides aṭangin contingent pahnih ve ve a ni. Parade tura tih sikul 14-te chu - Republic H/S, Chaltlang H/S, Bethlehem Vengthlang H/S, Synod H/S, JL H/S, Mizo H/S, Zemabawk H/S, Mamawii H/S, St. Paul's H/S, Home Mission School, Modern English School, Staine's Memorial HSS, St. Joseph H/S Section leh KM H/S-te an ni.

Sikul 14-te hian parade-a tel tura hriattirna an dawng tawh hlawm a, chutih rualin, Vang­laini palaiin a biak theih chinah, parade tura inbuatsaih an la awm lo. Nimin thleng khan parade a awm dawn lo tih hriattirna an la dawng lo a, media aṭangin an hriat thu an sawi hlawm.

July 15, 2020-a meeting minute-ah hian, Aizawl SP chu parade leh hnam puanzar pawh pharh chungchangah overall in-charge a nih thu te, August 10-12 chhungin zing dar 7-ah Lammualah parade practice neih tur a nih thu te, August 13-ah final rehearsal neih tur a nih thute tarlan a ni bawk. GAD-in July 28, 2020-a Mizorama DC tinte hnena I-Day lawm dan tura lehkha a thawnah chuan, state capital (Aizawl)-ah chuan I-Day lawmna chu zing dar 8-ah ṭan a nih tur thu te, Chief Minister-in hnam puanzar a pawh pharh tur thu te, hnam hla tihrîk (play) a nih tur thu te, state police-in guard of honour an neih tur thu te, state police, CAPF leh Mizoram Home Guards-in parade an neih tur thute tarlan a ni.

GAD lehkhaah hian, Aizawla I-Day lawmnaah state police, CAPF leh Mizoram Home Guards-te'n parade an neih tur thu tarlan a nih laiin, Aizawl DC R Lalramnghaka hoa July 29-a DC conference hall-a meeting chuan Aizawla I-Day lawm dan tur an rêlah, parade hrim hrim awm lo turin an rél leh thung. Sorkar thuchhuahah chuan, "Kumin Independence Day lawmnaah hian kum dang angin parade contingent an awm dawn lo a," tia ziah a ni.