MNF-in Exodus Day an hmang

MNF chuan nimin khan an party pisa, Mizo Hnam Rûnah Exodus Day leh pisa khârna inkhawm an hmang a; Mizo hnam tana martarte sûn nan minute khat chhung ngawi rengin an ding.

Inkhawm hi MNF vice president R Tlang­hmingthanga'n a kaihruai a; MNF president Zoram­thanga'n thu sawiin, MNF chu 'Pathian leh kan ram tan' titu an nih thu a sawi a, "Nunna tam tak, mi 2,000-3,000 velin an martar hnan kan ni a, bul ṭanna ropui leh hlu tak aṭanga bul ṭan kan ni. Eng emaw mai mai leh thli chhiain a len kawi theih kan ni ve lo a, kawng chhukchho zawh cháng awm mah se, pên bosan thiang kan ni lo," a ti.

Mizoram chu zu leh ruihhlo dangin chhiatna ramah a siam mek tih sawiin Zoramthanga chuan, "Zu leh ruihhloin min ei chhia a, kan rûm mek a ni. Hemi siamṭha tur leh khai chhuak tur hian ngaihtuahna i siam thar ang u," a ti a; thil thleng mekte chu MNF tana ṭha leh Congress tana ṭha lo lam hlir niin a sawi.

MNF President chuan, rilru thar siam turin an party mite a chah a, "Sorkar lo tur hian ka inngaihtuah chhin ngai lo a, Pathian leh mipui zarah kan sorkar ngei ngei ang. He ram hi economy malsawmnain kan khai chhuak dawn a ni," a ti.

MNF treasurer Vanlal­zawma, MLA pawhin thu sawiin, "Kumina Hnam Run kan khâr hi kum dang zawng aia a danglamna chu, nakkum tun ang huna office kan khâr leh hunah chuan sorkar thar nen kan ri mup mup tawh dawn a ni," a ti a; Mizote an awm chhung chuan Mizo nationalism a nun reng tur thu a sawi.

Inkhawmah hian MNF adviser Rualchhina'n Exodus Day lo chhuah dan a sawi a; Bangladesh independence sualna kara MNF ral lek lek dinhmuna ding tawh, Rangamati aṭanga Kaptai tuikhuahah lawnga kala mak taka Pathianin a humhim dan a sawi a ni.