Vawiinah PM Modi Joint NGO-in an thutlukna an sût

Prime minister Narendra Modi chuan vawiin hian Mizoram a rawn tlawh dawn a, chawhma dar 10 aṭangin Lammualah hun a hmang ang a, chumi hnuah Mi­zoram a chhuahsan leh nghal ang. Prime Minister-in Lammuala hun a hman turah tel lo tura NGO Coordination Committee (Joint NGO)-in Mizo mipui an ngen chu nimin khan an sût.

Ruahmanna siam dan chuan, Prime Minister hian Lammualah Tuirial Hydro Electric Power Project a hawng dawn a, DoNER-in North East Venture Capital Fund hnuaia cheque dawng tura a thlan pathum hnenah a hlan bawk ang. PM hi Union minister of state for Power RK Singh leh DoNER minister Jitender Singh ten an rawn ṭawiawm dawn a ni.

Central YMA, MHIP, MUP, MZP leh MSU-te telna Joint NGO chuan PM Narendra Modi-a'n vawiina Mizoram a rawn tlawh tura vantlang inkhawmah Mizo mipuite tel lo tura an ngenna chu nimin khan an sût tih an tarlang.

Nimina Joint NGO thuchhuah chuan, PM Narendra Modi-a’n vawiina Mizorama rawn tlawh tur chungchanga December 14 tlaia thuchhuah an lo siam tawh chu sût a ni tih a tarlang a, "Sorkar lam nena mumal taka indawrna neih a nih hnuah, hun tam zawk a neih theih tâk avangin PM leh Mizoram sorkar chungah lawmthu kan sawi a. Prime Minister lo kal tur hi lâwm taka lo dawnsawn ni se, Lammuala a programme neih turah pawh Mizo mipui a tam thei ang ber tel turin kan ngen a ni," an ti.

Thu dawn danin, Joint NGO hruaitute chu nimin khan Mizoram sorkar hotute nen an inbia a, PM Narendra Modi-a'n ruahmanna hmasa tidanglam hret a, hun tam zawk Mizoram (Aizawl)-ah a hman theih dawn avangin Joint NGO chuan an thutlukna hmasa chu an sût a ni.

Traffic SP-in thuchhuah a siam danin, Prime Minister a lo kal dawn avang hian vawiin zing dar 8:45 aṭanga chhun dar 11:30 inkarah Ṭhuampui Helipad leh Lammual inkar, Bawngkawn - Chaltlang - Zarkawt - Zodin Square kawngpuiah lirthei ding leh tlân a awm loh nan hmun tam takah lirthei tlân lai dan (block) a ni dawn a; kawng dan vanga harsatna a awm loh nan mipuite chu kawng dan hun hria a, insiamrem tura ngen an ni.

Lammuala Prime Minister programme-a kal turte chu a chunga sawi lirthei dan (block) hun darkar hria a, kawng dan hma darkar khat hma ngeia Lammual thleng hman tura inhmakhua turin Traffic SP chuan a ngen a, "Lammual chhungah hian main gate aṭang chauhin mi náwlpuia luhna siam a ni," a ti.