Aizawlah Sikpui Ruoi lawm a ni

Hmar Inpui (Mizoram Region) huaihawtin nimin khan Beraw tlangah Hmar hnam kût ropui ber, Sikpui Ruoi lawm a ni a, Hmar Inpui general headquarters president Joseph Lalrothang leh Sin­lung Hills Development Council (SHDC) chairman Hmingchungnunga ten an hmanpui.

Kût pa Joseph Lalrothanga chuan Mizoram ngeiah Sikpui Ruoi hman a ni chu ropui a tih thu sawiin, "Kum 2017 hi Hmar hnam tan kum ṭhat kum a ni a, HPC(D) leh Mizoram sorkar tluang takin an in bia a, remna leh muanna a awm thuai a beiseiawm. Chuvangin, Aizawla Sikpui Ruoi hman hi tih âwm rêng a ni," a ti.

Joseph Lalrothanga chuan, Hmar hnam chu Mizo hnam pêng pakhat a nih thu sawiin, Hmar mipuite chu Mizo hnam tihmingṭhatu nih tum turin a chah a; Mizo ṭawng thiam a ṭul thu leh Hmar ṭawng pawh thiam tel a ngaih thu te, Mizorama chengte'n state danga cheng Mizote chu Central Service-a hna zawn kawngah an entawn a ngaih thu a sawi bawk. Kût Pa hian 'Sikpui Ruoi' tih lekhabu Mizo ṭawng, Hmar ṭawng leh English-a ziah chu a tlangzarh a ni.

Sikpui Ruoi hi hun hnihah ṭhen a ni a, a thawh khatna chu lawmthu sawina hunah hman niin, hnam incheina chi hrang hrang leh hnam puan chi hrang hrang pholan a ni. A thawh hnihnaah hnam làm chi hrang hrang entir a nih mai bakah, zathiamte an zai a; tlaiah ruai an ṭheh bawk.

Sikpui Ruoi hi Hmar kût ngaihhlut ber leh ropui bera ngaih a ni a, kum ṭhat kum buh leh bâl an ngah kum te, khaw­tlangah harsatna emaw, thihna emaw a thlen loh kuma hman ṭhin a ni.