CM hoin hmachhawpte sawiho
Mizoram State Bharat Scouts & Guides (MSBSG) chuan nimin khan an president Lal Thanhawla, chief minister hoin CM banglaa banquet hall-ah meeting an nei a, hmachhawp hrang hrangte an sawiho.
Lal Thanhawla chuan, Scout & Guides inkaihhruainate chu naupang leh ṭhalaite nun khalh ngil nan leh kaihhruai nan a ṭangkai thu sawiin, "Changkannain a ken tel ni âwm a lang inthlahdahna, nun uluk lohna leh ruihlo kaihhnawih thila chak lohnate hmanga kan ṭhalaite harsatna tawh mek hi ṭanpui tura ṭan kan lak tlan a ngai. Chumi kawngah chuan NCC leh Scouts & Guides-te an pawimawh," a ti.
Meeting-a tarlan danin, kum 2016 chhungin scouts 15 leh guides 17-in Rashtrapati Award an dawng a; kum 2016 chhung vekin Cubs 26 leh Bulbuls 76-in Golden Arrow Award an dawn a, Scouts 47 leh Guides 53-in Rajyapuraskar Award an dawng a ni.
President of India hnen aṭangin May 12, 2016 khan ASC(G) Lalrosangi'n Silver Elephant Award leh ASG(S) K Lalrintluanga'n Silver Star Award an dawng bawk.