Bru hruai kîr dan tur ngaihtuah

Lunglei District Level Core Committee on Reang (Bru) Repatriation leh Mamit District Level Core Committee on Reang (Bru) Repatriation chu an district headquarters ve veah an ṭhukhawm a, March 2018 aṭanga Mizoram Bru raltlante Tripura-a hruai kir dan tur an ngaihtuah.

Lungleiah chuan nimin khan meeting neih a ni a, DC mawhphurhna la mektu Benjamin Lalzama'n a kaihruai. Benjamin Lalzama chuan, Bru lak let hna chu Ministry of Home Affairs leh Mizoram State Level Core Committee (SLCC) duh dan leh ruahman angin fimkhur taka kalpui a ṭul thu thu a sawi a, "Tripura transit camp aṭanga Lunglei district kawng a thui avangin, ruahmanna mumal tak nen department kaihhnawihte ṭha taka thawhho a pawimawh," a ti.

November 2016 thlenga Lunglei district-a Bru hruai kîr tur chhinchhiah zat chu chhungkaw 384 an ni a, khaw pali-ah sem darh tura ruahman a ni.

Mamitah chuan district bawrhsap Lalbiaksangi hoin DC Conference Hall-ah an ṭhukhawm a; Bawrhsap chuan, Bru-te chu an awm mekna aṭangin Mizoramah lungmuang taka let theih nan ruahmanna siamte a nih dan tur ang taka kalpui a ngaih thu a sawi.

Lunglei leh Mamita meeting-ah hian, Bru lak letna atana sum mamawh zat leh a hman dan tur, lirthei mamawh zat, venhimna lam, an hriselna lam buaipui, an chen lailâwkna tur, ei leh in tur ruahmanna leh ṭul dang hrang hrangte sawiho a ni. Bru lak letna atan hian November 2016-ah an awmna hmunah kalchilhin enfiah an lo ni tawh a ni.