Larsap-in MJA member-te a kâwm

Governor Lt.Gen. Nirbhay Sharma chuan nimin khan Raj Bhavan-ah NEDP hnuaia press study tour-a Gujarat-a kal MJA member ṭhenkhatte a kâwm a, an zinnaa an thil zir chhuahte a zâwt.

Gujarat-in sorkar ṭha tak an neih avangin an state-in hma a sawn nia an hriat thu MJA member-te'n an sawi chung­changah Governor chuan, "Sorkar ṭha awm mah se, mipui an ṭhat loh chuan awmzia a awm thei lo. Mizo mipuite hian nun phung leh hnathawh kawngah hma an sawn a ngaiin ka hria. Hnathawk lo tam tak hmuh tur an awm laiin, state páwn aṭangin hnathawk tur an rawn lut reng a ni," a ti.

Larsap chuan, Mizo mipuite'n English leh Hindi thiam kawngah ṭan la se a duh thu sawiin, "Ṭawng leh sakhuana a inzawm lo. Ka zinna tam takah sakhuana vanga Hindi thiam duh lo ka hmu ṭhin a, hei hi a dik lo. Hindi an thiam avangin sakhaw dangah an inlet dawn tihna a ni lo," a ti a; hmasawnna kawng zawh tur chuan ṭawng thiam a pawimawh thu a sawi.

Governor chuan, MJA member-te chu mipui rilru sûkthlêk leh ngaihdan siamtu an nih thu sawiin, tour an neih aṭanga an thil zir chhuahte chu mipui entawn atana tarlang thiam turin a chah a ni.