HSS Games champion Mizo HSS

Mizoram Higher Secondary School Games 2017 chu zawh a ni ta a, a pumpuiah Mizo Higher Secondary School an champion. Nimin khan Mizo H/S Field-ah Games khârna inkhawm hman a ni a, School Education secretary Esther Lalruatkimi'n hmanpuiin, lawmmante a sem.

16th. Mizoram HSS Games hi December 12, 2017-ah ṭan a ni a, Aizawlah khelmual leh indoor stadium hrang hrangah zirlaite an intihsiak a ni. Intihsiaknate chu - athletics, badminton, basketball, football, table tennis, taekwondo leh volleyball-te a ni a; Aizawla HSS 14 leh Aizawl páwna HSS 12 telin, sikul 26 aṭangin zirtirtu 134 leh zirlai infiam mi 1,411 (mipa 898 leh hmeichhia 378) an tel.

HSS Games-ah hian a pumpuiah Mizo HSS chuan gold medal 12, silver 9 leh bronze 8 lain, pakhatna an ni a; gold 8, silver 5 leh bronze 3 latu Thenzawl HSS pahnihna niin, gold 6, silver 4 leh bronze 2 latu Mamawii HSS pathumna an ni. Best athlete (boys) chu Abija Lalrindika, Serchhip HSS a ni a, best athlete (girls) chu CS Remsangpuii, Thenzawl HSS a ni.

School Education secretary Esther Lalruatkimi chuan, zirlaite chu ruih theih thil leh nungchang ṭha lo laka inthiar fihlim a, inthunun tur te, an hun lo kal zel turah an inchhîr loh nan fimkhur turtein a fuih a; infiamna lamah Mizoram leh India ram tana national leh international level thlenga hlawhtling thei tura inbuatsaih turin a chah bawk.

HSS Games 2017 Top 10 Medal Tally
# School G S B Total
1. Mizo HSS, Aizawl 12 9 8 29
2. Thenzawl HSS 8 5 3 16
3. Mamawii HSS 6 4 2 12
4. Republic HSS 3 3 4 10
5. KM HSS 3 0 3 6
6. GM HSS, Champhai 2 3 3 8
7. Serchhip HSS 2 2 2 6
8. Durtlang HSS 2 0 0 2
9. Synod HSS 1 4 1 6
10. JL HSS 1 1 7 9