KHAWTHLIR

Thisen pe
Kulikawn Bial KṬP chuan nimin khan blood donation camp an huaihawt a, Aizawl Civil Hospital tan mipa 34 leh hmeichhia pathumte'n thisen unit 37 an pe. AVBD leh blood bank-te'n Krismas puala blood donation an buatsaih mekah nimin thleng khan mi 47-in blood bank-ah thisen an pe tawh a ni.

Himpuia lawmpui
Mizoram Pradesh Youth Congress Committee (MPYCC) chuan thuchhuah siamin, Mizoram sorkarin Mizoram Youth Commission (MYC) chairman atana Joseph Lalhimpuia, MLA a ruat chu lawmawm an tih thu an tarlang a, "Mizoram leh hnam, a bikin ṭhalaite tan theihtawp chhuah a, chak leh ṭha taka a thawh theih nan duhsakna kan hlan a ni," an ti.

Sikul dincham
Kawnpui High School chuan nimin khan an sikul tualah an kum 50-na, golden jubilee an lawm a, he sikula zirtirtu hmasa ber zinga mi Rev.Dr Zaihmingthanga khuallian a ni. Kawnpui H/S hi June 6, 1967-ah din a ni a, zirtirtu pakua, non-teaching staff pahnih leh zirlai 138 an awm mek a ni.

Zirlai chawimawi
Nimin khan Tlungvel High School-ah Tlungvel khuaa zirlai hlawhtlingte chawimawina leh career guidance programme hman a ni a, bialtu MLA Lalrinawma khuallian a ni. Lalrinawma chuan, zirlaite chu zirna uar tur leh taima taka lehkha zir turin a fuih.

NLUP sem
Horticulture department chuan Ningani khan Ṭawipui South leh a chhehvela NLUP dawngtu chhungkua 172 hnenah ṭanpuina an sem a, Lunglei HPC vice chairman S Laldingliana'n a hmanpui. Ṭanpuina hi chhungkaw 172 hnenah Rs. 61,72,790 sem ral a ni.

Jubilee lawm
Health Workers’ Training School, Kulikawn chuan nimin khan an hmunah an kum 60-na, diamond jubilee an lawm a, Health minister Lal Thanzara'n a hmanpui. Health Workers’ Training School hi April 1950 aṭangin Aizawl Civil Hospital-ah DAI Training Course ṭan a ni.