Lirnghing tuarte thlamuan tura Thawk chhuakte minister-in kâwm

Health minister Dr R Lalthangliana chuan nimin khan a pisaah Mizoram sorkarin tun hnaia khawchhak lama lir­nghing tuartute thlamuan tura tirh team hrang hrangte a pisaah a kâwm a, an hmalakna leh an thil hmuhte a sawipui. Inkawmnaah hian Champhai district-a MLA pathum - TJ Lalnun­tluanga, Dr ZR Thiamsanga leh Ramthanmawia te pawh an tel.

Dr R Lalthangliana chuan, hripui vanga rilru hlauthawng taka mipui an awm mek laia Mizoram khawchhak lama chengte'n vawi 90 chuang lirnghing an tuar chu Zoram mipuiin an khawngaih thu a sawi a, "Tih theih kan nei tam lo chungin kan rilru leh ngaihtuahnaah an awm reng a ni tih hria se ka duh," a ti.

Sorkarin medical team pathum, Mizoram University hnuaia Psychological Support and Guidance team pasarih leh Geo­logy & Mineral Resources department hotute khaw­chhak lama lirnghing tuar­te ngaihven a, an harsatnate enpui tur leh a ṭul ang anga thlamuan turin a tih thu R Lalthang­liana chuan a sawi.

MLA pathumte pawhin thu an sawi a; lirnghing vanga an bial chhunga mipui mang­angte chunga Zoram mipui leh sorkarin lai­natna leh ngaihsakna an lantir chu lawmawm an tih thu sawiin, "Thlamuan an mamawh lai tak leh mithiam an mamawh lai taka sorkarin hma a la hi bial mipui aiawhin lawm­thu kan sawi a ni," an ti.