Chhiah chungchang zirho a ni

Taxation department chuan nimin khan an auditorium-ah an department officer-te tan work contract chung­changah ram pum huapa hnathawh dan en lêtna leh, chak zawka hmalak zel theihna tur leh VAT aṭanga GST-a inlehna hun kar tla chungchanga inzirtirna leh sawihona hun an buatsaih.

Workshop hawngtu Taxation commissioner Kailiana Ralte chuan, Covid-19 vangin ram sum leh pai dinhmun India ram pumah a tlahniam tih sawiin, "Sorkara sum chhung lut­tu ber chu Taxation department kan nih angin, mipui leh chanchin thar lakhawmtute pawhin kan hmalakna an thlithlai reng a ni," a ti a; Taxation officer leh staff-te chu an hna leh mawhphurhna chu an dinhmun hriltu a nih avangin ṭhahnemngai tak leh dik taka thawk zel turin a chah.

Taxation Commissioner chuan, April 2020-ah GST aṭanga chhiah lut chu cheng vbc. 11 a nih laiin, July-ah chuan cheng vbc. 45 a nih thu tarlangin, "Hei hi Taxation department officer leh staff-te theihtawpa ṭan lakna rah a ni," a ti.

Workshop-ah hian mi hrang hrangin chhiah chungchanga thil pawimawhte an sawi a, zawhna leh chhanna hun hman a ni bawk.