Joint NGO-in PM hnenah thu an thlen

December 16, Inrinnia Mizoram rawn tlawhtu prime minister Narendra Modi hnenah NGO Coordination Committee (Joint NGO) hruaitute chuan memorandum an lo pe.

Joint NGO hian PM Narendra Modi hnenah hian Shillong pana a thlawh chhuah hmain Ṭhuampui helipad-ah minute 15 vel chhung an hmu a; PM hian a hnena memorundum thehluh chu a ṭul anga en zui a tum thu a sawi niin Joint NGO hruaitute chuan an sawi.

Joint NGO hian an memorandum-ah hian Citizeship Amendment Bill, 2016 chu Parliament-a pass lo tura ngenna leh pass a nih chuan Mizoram tana a him loh tur thu te, Tripura relief camp-a awm mek, Bru, Mizorama lêt duh lote chu Tripura-a awm hlentir an nih theih nan hma lakpui tura ngennate an ziak.

Bru chungchangah hian Joint NGO chuan, Tripura-a Mizoram Bru-te chu vawi tam tak Mizorama hruai kîr tum a nih tawh thu leh tun thlengin an la let duh loh thu an ziak a; kum 2018-a Mizoram Assembly inthlanah chuan Mizoram Bru-te chu Tripura-a an awmnaah vote thlaktir an remtih dawn loh thute pawh an ziak a ni.

India leh ṭhenawm ramte inrìnna hung chu chhunzawm tur leh ramria venhimna ṭha zawk a awm theih nana hma lakpui tura ngenna leh Aizawl khawpui laili laia Assam Rifles chu sawn chhuah an duh thute an thlen bawk a; memorandum-a an ziah tel loh, CSS hnuaia Hindi zirtirtute chungchang an sawipui bawk.