Chief Minister Zorama'n ZIDCO pisa a tlawh

Chief minister Zoramthanga chuan nimin khan Zoram Infrastructure and Industrial Development Corporation Ltd. (ZIDCO) pisa a tlawh a; thawktute chu Mizoram hmasawnna atana mawhphurhna lian tak an neih thu hrilhin, ṭhahnemngai taka thawk turin a fuih.

ZIDCO chairman Lalthlang­liana chuan, State Planning Board rawtna angin ZIDCO chu infrastructure (construction work) lam khawih thei tura duan thar a nih dan thu sawiin, "A hming pawh 'Zoram Infrastructure and Industrial Development Corporation Ltd.' tia thlak a ni a, June 4, 2020 khan Companies Act hnuaiah Ministry of Corporate Affairs-in a pawmpui tawh," a ti a; infrastructure development lam an thawh theih tawh dawn avangin Engineering Wing tihlen tum mek a nih thu a sawi.

ZIDCO managing director Lalramsanga Sailo chuan, ZIDCO-in mi 4,961 hnenah loan cheng nuai 4,576 a pek chhuak tawh thu a sawi bawk. ZIDCO hi kum 1978-a din a ni a, Mizorama corporation upa ber a ni. Thawktu mi 40 an awm mek a, April 2020 aṭangin Mizoramah buhfai supply hna an thawk mek a ni.