IMA-in medical body thar siam duh lo

Indian Medical Association (IMA) chuan Medical Council of India thlakna tur draft bill siam chu na takin an dodal a, hei hian medical lama hnathawkte a nghawng pawi theih tur thu an sawi.

Union cabinet chuan Medical Council of India thlakna tur, National Medical Commission draft bill chu kar kalta Zirtawpni khan a pawm a ni.

Draft bill-ah hian autonomous board pali siamna tur ruahman a ni a, hengte hi National Medical Commission hnuaiah undergarduate leh postgraduate education, medical institution assessment leh accredition bakah registration of practitioner buaipui tura tih an ni.

IMA president Dr KK Aggarwal chuan prime minister hnenah draft bill hi ennawn leh turin a ngen a ni. IMA chuan NMC hian medical profession a tibuai zawk dawn niin a sawi.

Aggarwal chuan NMC chu thuneituten an control theih a ni dawn tih sawiin, Medical Council of India tiboin, IMC Act section 15 pawh a tibo dawn niin a sawi a, he act hnuaiah hian modern medicine practice tura basic qualification chu MBBS a ni. Aggarwal chuan India rama doctor-ten an medical council thlan tura voting right an neih chu lakbo sak an ni, a ti. Medical Council of India chu India rama medical profession aiawhtu a ni a, registered medical practioner tupawhin inthlana an chuh thei a, qualified doctor tawh phawt chuan vote an nei bawk a ni, a ti. Mahse sorkar chuan hei hi tibo a, hruaitu tam zawk sorkarin a nominate te dahna tura thlak a tum chu hmasawnna ni loin, hnungtawlhna zawk a ni, a ti.

Draft bill-ah hian commission chuan sorkarin a nominate chairman leh member an awm dawn a, board member-te pawh Cabinet Secretary kaihhruai search committee in a thlang dawn a ni. Member hi thlan chhuah panga leh, ex-officio member 12 an awm ang.