Field thawm ṭhatna tur lungphùm phúm budget páwn aṭangin hna kan thawk - Chief Minister

CM Zoramthanga chuan, sport-a changkang turin ram a changkan a ngaih thu a sawiin, "Hmânte ngaihtuah chuan Mizoram hian khawvelah lanna kan ngah tawh. Kan taksa kan tihhmasawn zel chuan kan langsar zel ang. Kan ram changkang ang zelin sport-ah pawh khawvel­ah Pathian zarah kan lan ngei ka ring. Field chei ṭhat hian football chauh ni loah hmingṭhatna a hrin chhuah ka ring," a ti.

Home minister Lal­chamliana pawhin thu sawiin, khelmual chei ṭhat chu bial chhung mipui bakah, a chhehvel­te pawhin an hman ṭangkai a beisei thu a sawi. Sports minister Robert Romawia Royte chuan, "Phûl lem hi mi tam zawkin an hman theih tura siam kan tum," a ti a, mi tam zawkin a hman theih nan phah belh zel a nih tur thu a sawi.

Technical report petu SYS secretary H Lal­engmawia sawi dan­in, field thlang lamah RCC structure extension a chhâwnga siam tur a ni a, a pumpuia sum ruahman chu cheng nuai 4,635 a ni. Extension-ah pavillion & gallery mi 5,000 vel len theihna, motor parking, dormitory, guest room, kitchen, dining room, toilet, bathroom, gymnasium room leh quarters awm tura ruahman a ni. Phûl lem phah chin tur chu a dung metre 110 leh a vâng metre 74 a ni a, playing area bik chu a dung metre 105 leh a vâng metre 68 a ni ang.