CYMA-in LGBTQI in sak an duh lo ; Deputy CM Tawnluia hoin sawiho a ni

Central YMA hruaitute chuan nimin khan chief minister Zoramthanga an hmu a; lesbian, gay, bisexual, transgender, queer, intersex (LGBTQI)-
te tana UDPA department-in in (shelter) sak a tum chu kaltlangpui lo turin an ngen. Nimin vêk khan LGBTQI shelter sak tum chungchang chu UDPA changtu deputy chief minister Tawnluia hoin a pisaah department hotute'n an sawiho.

Urban Development and Poverty Alleviation (UDPA) department chuan sorkar laipui aṭanga thu an hmuh angin, December 6, 2022 khan LGBTQI shelter sakna tur tender a tichhuak a ni.

Vanglaini palai zawhna chhangin CYMA president R Lalngheta chuan, Chief Minister an hmuhnaah hian LGBTQI (neih inang inkawp, adt.)-te chenna tur in sak tura hmalak mek chungchang an sawipui tih a sawi a, "Cancel a ṭha lo'm ni kan ti a. CM pawhin, ni e, Deputy Chief Minister ka lo sawipui ang, tiin min chhang," a ti.

R Lalngheta chuan, LGBTQIte tana in sak chu Mizoram tan a inhmeh loh thu sawiin, "Mipui aṭang pawhin hma la tura nawrna a nasa. Term hmasa lamah pawh khan Social Welfare Minister kan lo sawipui tawh," a ti a; LGBTQI tan bika in sak chu ṭhulh a nih ngei an beisei thu a sawi.

Vanglaini thu dawn danin, LGBTQI tana in sak tum hi sawiselna a tam avangin Deputy CM hoin nimin khan ngaihtuah ṭhat a ni a; LGBTQI shelter sak a nih dawn leh dawn loh chungchangah Chief Minister hoa thutlukna siam turin an dah.

UDPA department hotute chuan, National Human Rights Commission leh sorkar laipui lam aṭanga nawrna a awm avangin LGBTQI shelter home sak tum a nih thu an sawi.

'Construction of LGBTQI Shelter at Sakawrtuichhun, Aizawl' atan hian UDPA department chuan December 6, 2022 khan tender an chhuah a; Sakawrtuichhunah Rs 35,00,000 hmanga sak tum niin, thla ruk chhunga sak zawh tura tih a ni. In sakna tur sum hi National Urban Livelihoods Mission hnuai aṭangin hmuh a ni tawh.