Naupang pawngsualtu mi pahnih Court-in thiam loh a chantir

Champhai District Court-a special judge (POCSO Act) Sylvie Z Ralte leh Fast Track Special Court presiding officer Saikunga te chuan naupang kumtling lo pawngsual thubuaiah mi pakhat ve ve thiam loh an chantir.

Special judge Sylvie Z Ralte chuan, September 26, 2020 tlaia Champhai khawpui chhung veng pakhata hmeichhe naupang kum 5 mi pawngsualtua puh C Lallianpuia, Champhai Venglai chu kum hnih chhung a thubuai ngaihtuah a nih hnuah POCSO Act leh IPC Sec 341 hmangin thiam loh a chantir a ni.

C Lallianpuia thubuai hi Covid-19 léng vangin a ngaihtuah hun chhung pawhsei a ni a, Special Court-in thuhretu hrang hrangte leh a chhuitu (investigating offi cer) thu a zawhfiah hnuah, C Lallianpuia thu hretu mi palite thu a zawtfi ah leh a ni. Court chuan nimin khan C Lallianpuia chu thiam loh a chantir a; hrem a nih dan tur chu vawiinah puan a ni ang.

Special Judge chuan, C Lallianpuia hi zirtirtu leh khawtlanga inhmang tak a ni tih hre mah se, dan chuan mi tê ber aṭanga lian ber thlengin ang khatin ro a relsak thu leh, tu mah a en hrang lo tih a sawi a; mipui himna chu dan ngaih pawimawh ber a nih angin, dik takin Court-in ro a rel zel dawn thu a sawi bawk.

Fast Track Special Court presiding officer Saikunga chuan, Khawzawl khawpui veng pakhata hmeichhe naupang kum 11 mi pawngsualtua puh Vanramnghaka, Khawzawl chu thiam loh a chantir a, kum 20 chhung jail-a táng tur leh Rs 5,000 chawi turin a hrem.

Vanramnghaka hian March 16, 2022 khan hmeichhe naupang a pawngsual a, pawngsual tawktu hmeichhe naupang pain Khawzawl Police Station-ah thubuai a thehlut a ni.