MYC Youth Centre hawng

Labour, Employment, Skill Development & Entrepreneurship (LESDE) minister Lalchhandama Ralte chuan nimin khan New Capital Complex-ah Mizoram Youth Commission (MYC) hnuaia din Youth Centre (Ṭhalaite Inpui) a hawng.

Lalchhandama Ralte chuan, MYC chu kum 2008-a din chauh ni mahse ṭhalaite tana an hmalakna fakawm a tih thu a sawi a; MYC chuan zirna bakah, sumdawnna, infi amna leh eizawnna tlak thiamna nei thei turin ṭhalaite tan zirna a buatsaih ṭhin thu leh a rah chhuah ṭha pawh hmuh mek zel a nih thu a sawi.

MYC chuan hmathlir fel tak neiin ṭhalaite tan khawvel nuam zawk siamin hma a la mek zel tih sawiin Lalchhandama Ralte chuan, "Zirna chauh ni loin sumdawnna, infiamna leh eizawnna tlak tling nei thei turin training a kalpui ṭhin a, a rahchhuah ṭha pawh hmuh mek zel a ni," a ti.

LESDE Minister chuan ram leh hnam hmasawnna leh intodelhna turin thalaite an pawimawh takzet tih sawiin, "An hnena thiamna leh ngaihtuahna thar pek hi MYC tum ber a ni," a ti a, ṭhalaite chu thiam leh ṭangkai taka MYC hmang turin a chah.

MYC chairman Dr Vanlalṭanpuia, MLA pawhin thu sawiin, Youth Center chu Aizawl bakah, Lunglei leh Serchhipah hawng tura ruahman mek a nih thu te, Aizawl, Lunglei, Champhai, Kolasib leh Siahaah coaching centre hawn a nih tawh thu a sawi.

MLA dang H Biakzaua leh K Laldawngliana ten thu an sawi bawk.