Hunpuia venhimna kalpui dan tur sawiho

Kumin Krismas vuakvêta dan leh thupek kenkawh leh venhimna kalpui dan turah nimin khan Lunglei district additional DC Donny Lalruatsanga kaihhruaiin DC conference hall-ah Police, Exciase & Narcotics department, Transport leh IPR department hotute leh tlawmngai pawl aiawhte an ṭhukhawm a; December ni 24 leh ni 31-ah joint patrolling neih an rêl.

Ṭhutkhawmah hian, hunpui laiin lirthei chetsualna a tam ṭhin avangin Traffic Special Drive kalpui an rél a, DTO hmalaknain uluk takin lirthei endik ni se, an ti a; lirthei khalhtute, a bikin khualzin phur lirthei khalhtute hnenah fimkhur tura ngenna tihchhuah an rêl.

Rûi chunga lirthei khalh mante chu dan anga na taka hrem ngei ni se, zu rui leh dan bawhchhia mante pawh danin a phût ang ngeiin hrem vek ni se, an ti bawk.

Meeting-a tarlan danin, Lunglei police-ten tun dinhmunah ni khatah patrolling vawi li an nei ṭhin a; chhunah vawi hnih leh zan lamah vawi hnih an nei ṭhin.

Hunpui chhungin mipuite'n awlsam zawka police an pan theih nan leh chak zawka venhimna kalpui a nih theih nan Lunglei khawpui hmun lûn lai pathum - Chanmari, Police Station kawt leh Sobji Bazarah a duh apiang pan theih turin nimin aṭang khan Police Help Desk an siam a ni.

Hâlpuah, hâlmawi, meithallàwn leh silai lem (a mu kâp chhuak thei) khapna thupek kengkawh turin Flying Squad din a ni a; rîkrum thil a thlen palha che chhuak thuai thei turin Quick Response Team (QRT) din a ni bawk.

Excise & Narcotics department chuan MLP Act, 2019 leh NDPS Act, 1985-te ṭha taka kenkawh a nih theih nan December 15, 2022 aṭanga January 5, 2023 thleng duty turin mi 26 an ruat tawh.

YMA Sub-Headquarters, Lunglei hmalaknain December 8, 2022 khan Lunglei khawpuia YMA branch hrang hrang hruaitute'n hunpui laia hmalak dan tur an rêl tawh a; branch tinte'n duty booth an siam dawn a ni.