Central YMA-in kuhva tawlhrûk Na taka do turin CM an ngen

Central YMA hruaitute chuan nimin khan chief minister Zoramthanga an hmu a; ram dang aṭanga lak luh kuhva rah tawlh rûk, Bangladesh aṭanga Zo hnahthlak ráltlânte leh LGBTQI chungchang an thlen.

CYMA hruaitute chuan, Myanmar aṭanga kuhva rah dan loa lak luh/tawlh rûk chungchang CM Zoramthanga an sawipui a, chak zawka hmalak a nih theih nan ṭan lâk a ṭul thu an thlen.

CYMA president R Lalngheta chuan Vanglaini palai zawhna chhangin, kuhva rah tawlh rûk chungchangah nasa zawka sorkar a chêt a ngaih thu CM hnenah an thlen tih a sawi a, " il ṭha lo lian zawk a thlen a hlauhawm a, chuvangin, na zawka sorkar a chêt a ngai a ni," a ti.

R Lalngheta sawi danin, kuhva rah tawlh rûk leh a do dan tur chungchang December 15, 2022 (Ningani) khian sawiho a ni dawn a; Home & Taxation Minister leh Commerce & Industries Minister tel ngei tura ruahman a nih bakah, a kaihhnawih sorkar hotute tel tura tih a ni.

Central YMA hruaitute chuan Bangladesh aṭanga Zo hnahthlak râltlân, Mizorama rawn lutte chungchang CM Zoramthanga an sawipui bawk a; ráltlânte chênna hmun tur sorkarin ngaihtuahsak se an duh thu leh, hlawm khat deuha dah an duh thu an thlen a ni.