Ram siam hna kan thawk ṭan thei dawn chauh- Dr R Lalthangliana

MNF adviser Dr R Lalthangliana, minister chuan, chief minister Zoramthanga chu Pathian ṭih mi a nih thu leh harsatna avangin ram siam hna an thawk ṭan thei dawn chauh thu a sawi.

Nimina Mizo Hnam Rûna inkhawmah thu sawiin Dr R Lalthangliana chuan, "Tun term ang rêng rênga MLA ṭha kan neih hi ka hre ngai lo. Bial ngaihsak, mi thiam tak tak kan nei a, Pathian ṭih mi CM kan nei bawk. Hripui leh harsatna lian tak tak avangin ram siam hna thawk turin hna kan thawk ṭan chho thei dawn chauh a ni," a ti.

MNF Adviser chuan, "Rorel ngawr ngawr hi a châka châk chi a ni lo, ram siam hna thawk tura inpekna rilru neia hmanruaa inpek a ngai," a ti a; MNF sorkarah harsatna lian tham tak tak - Covid-19, vawk hri, ráltlân, lirnghîng leh ramri buai an hmachhawn thu a sawi.

MNF chu ni pawimawh nei mumal ber an nia sawiin R Lalthangliana chuan, "Innghahna lungphûm, Pathian leh kan ram tan tih a ni a, kan ram aiin Pathian kan dah hmasa a, Pathiana innghat kan ni. Party tam tak hming thlakin an zuih ral tawh a, MNF erawh chu châwl miah loa diamond jubilee thleng thei kan ni," a ti.

Dr R Lalthangliana chuan, sorkar leh turin rilru hrisel tak pûa thawh a ngaih thu leh hah a ṭul thu sawiin, "Pathian thua kan awmna hi kan sorkar lehna tur a ni," a ti a; Congress party chu tuna MLA an neih mek zat nei tawh lo tur an nih thu leh, ZPM pawh social media-a innghat, thâwm chauh lian, ṭiau chunga in sa ang an nih thu a sawi bawk.