Dan loa tih hi dan a ni ta ber - ZPM Consultant

ZPM Consultant Haukhuma Hauzel chuan, Mizoramah eirukna a hluar avangin eirûkna do turin kohhran a au chhuak ta hial tih a sawi a, ram dang aṭanga dan loa kuhva lak luh chungchanga Mizoram sorkar hmalak dan a lungawithlak loh a, dan loa thil tih chu dan a nih ber tawh thu a sawi bawk.

Nimina ZPM pisaa inkhawmah thu sawiin chief secretary hlui Haukhuma Hauzel, IAS (Rtd.) chuan, "Tunlaiin kan ramah mimal induhsakna leh uchuak taka sum insiamsak tawnna a hluar em em.

Dan lo anga tih hi dan a ni ta ber a, kuhva ro tawlh rûk chungchangah pawh a ni a, a lungawithlak loh hle a ni," a ti.

Haukhuma Hauzel chuan, "Politics inkaihhruaina mumal zawk duhin kohhran hial a au chhuak a, eirûkna do an rél. MKHC pawhin kuhva tawlh rûk leh kuhva hralhna chungchanga hma la tur in Union minister Pu John Barla hnenah an lo thlen a ni.

YMA rorel inkhawmah pawh eirûkna do an rêl a ni," a ti a; Pathian thu sawite'n kan ram rorelna fel lo chungchang a ruhlang râwtin an sawi tawh tih a sawi.

Enviroment humhalhna dan chu sorkarin hreh tak chungin high court-ah a appeal thu sawiin Haukhuma chuan, "Tunah chuan compensation duhtute nawrna avangin a inhnûkdâwk ta. Hei hi ṭha ti loin pawl ṭhenkhatin hma an la mek. Tuna kan kal danah hi chuan, kan environment aiin compensation ûmtute'n ngaih pawimawh an hlawh zawk tih theih hialin a awm ta," a ti.

Haukhuma chuan, political party hruaitu pathumte media-in an kawmnaah, chief minister ni tawh pahnih chuan eirûkna chungchang an chhâng pial a ni tih a sawi a, "Kan hotute erawh hi chu eirûknaa fihlim, eiru lo tur leh a do tura intiam ngam an ni a, hei aia innghahna tlak a awm lo ang," a ti a; eirukna do chungchang chu ZPM policy-ah dah a nih thu a sawi.