Congress party-in Synod rorel an thláwp

Mizoram Pradesh Congress Committee (MPCC) chuan thuchhuah siamin, Synod Inkhawmpuiin hlemhlêtna do tur leh ram hruaitute khalh ngil tura politics siamṭhat tuma hmalak an rel chu Congress party-in an thlàwp thu an tarlang.

MPCC chuan, Synod Inkhawmpui vawi 99-na tluang taka zawh a ni chu lawmawm an tih thu tarlangin, "Synod inkhawmpuiin kan ram hma lam hun atana fimkhur tak leh ngaihtuahna uluk tak hmanga hlemhlêtna do tur leh ram hruaitute khalh ngil tura politics siamṭhat tuma chak zawka hmalak an tumna hi lawmawm kan ti a, theihtawpin kan thláwp dawn a ni," an ti.

MPCC chuan, "Congress party chuan kohhran kaltlanga kan ramin hmasawnna tam tak kan neih te, kohhranin kan ramah remna leh muanna palai hna nasa taka a thawh avanga remna leh muanna kan neih hlutziate kan hre reng a, kan ngaihlu tak zet a ni," an ti a; Mizorama hlemhlêtna ûm bo tur leh politics ṭha leh dik kan neih theihna tura kohhran hmalakna tihlawhtling tura theihtawp chhuah turin Congress party leh Mizoram mipui an ngen.

Congress party chuan, MPCC president Lalsawta'n sum chakna chhu chat tur leh MLA candidate-te tihautak lo tura mipui a ngenna leh Congress party-in hma a laknate hriatsak tur leh ṭawngṭaipui turin Mizoram mipui an ngen bawk.