Mizoram Secondary School Games ṭan a ni

Mizoram Secondary School Games vawi 39-na chu nimin khan Serchhip Sports Stadium-ah ṭan a ni a, Assembly deputy speaker Lalrinawma'n a hawng.

December 13-16, 2022 chhunga neih tur 39th Mizoram Secondary School Games-ah hian district tin aṭangin zirlai infiammite an tel a, Aizawl district bik chu North leh South-ah ṭhen niin, an vaiin district 12 an ni a, zirlai infiammi 630 leh anmahni hruaitu zirtirtu 66 an tel. Athletics, badminton, table tennis, volleyball leh football-ahte an inel dawn a ni.

Games hawngtu Lalrinawma chuan, tunlaiah chuan infiamna chi hrang hrangte chu eizawnna a tling deuh vek tawh tih sawiin, "Theihna leh tuina neite tan kawng zau takin a inhawng. Infiamna lama theihna neite zawn chhuahna buatsaih thiam pawh a pawimawh hle a, chutiang atana hun ṭha buatsaih a ni hi hlu hle a ni," a ti.

Lalrinawma chuan, infiamnain taksa mai bakah, rilru hriselna a ken tel avangin hriselna ngai pawimawh turin zirlaite a chah a, "Vawiina zirlaite hi he ram chunga mawhphurhna pawimawh tak chelhtute in ni a, a chhiat a ṭhat in kutah a innghat thui em em a ni," a ti a; rilru thianghlim taka inelna hmachhawn turin a chah.