LGBTQI Shelter sak tum sût a ni

LGBTQI (Lesbian Gay Bisexual Transgender Queer Intersex)-te tana Sakawrtuichhun, Aizawla chenna in (shelter) sakna tur tender chu December 12, Thawhṭanni khan sût (cancel) a ni.

LGBTQI (neih inang inkawp, adt.)-te tana in sakna tur sum hi Ministry of Housing & Urban Affairs-in SPRK Incentive Award 2019-20 hmanga Mizoram sorkara a rawn pek a ni a; in sakna tura December 6, 2022-a tender chhuah tawh sûtna thupek chu December 12, 2022 khan UDPA department executive engineer C Malsawma chuan a chhuah a ni.

Tarlan tawh angin, Central YMA hruaitute chuan December 12, 2022 tlai khan chief minister Zoramthanga an hmu a; LGBTQI-te tana UDPA department-in in (shelter) sak a tum chu kaltlangpui lo turin an ngen a ni.

Hetih lai hian, rorel lai MNF party chuan thuchhuah siamin, LGBTQI Shelter sakna tura tender chhuah tawh sût a ni chu lawmawm an tih thu an tarlang a, "Cancel a nih theihna tura hma latu chief minister Pu Zoramthanga leh UDPA minister Pu Tawnluia chungah lawmthu kan sawi tak meuh a ni," an ti.

MNF thuchhuah chuan, "MNF party hi sakhaw tih bik nei a ni a, 'Pathian leh kan ram tan' tih thupuia neitu a ni. Kristiante Pathian hi MNF-in Pathian a tih chu a ni," an ti a; Pathian duh loh zawnga ram leh hnam chîmral tumna awm thei leh Kristiante rinna pawlh dal thei záwnga chêtna an do zel dawn thu an tarlang bawk.