Minister Beichhua a báng 'Ka hma lam hun ka sawi thei lo' - Beichhua

Minister of state Dr K Beichhua chuan, chief minister Zoram­thanga'n ti tura a tih angin, nimin chhun dar 12:45 vel khan minister aṭanga bànna Chief Minister hnenah a thehlut. A bànna hi nimin tlai khan CM thuràwn angin Governor-in a pawm nghal. K Beichhua chuan, MNF party mi leh sa la ni mah se, a hma lam hun a sawi theih rih loh thu a sawi.

Chief Minister hian Dr K Beichhua hnenah December 12, Thawhṭanni khan lehkha a thawn a, "Ka Cabinet minister leh an hna chanpual (portfolio)-te ka siam danglam duh a, chuvangin, Cabinet-a minister of state i nihna aṭanga i bànna ka hnenah rawn thehlut ta che. A hma thei angin i rawn pe dawn nia," tiin a ziak.

CM lehkha hi Dr K Beichhua hian Thawhṭanni tlai dar 4 velah a hmu a, bànna thehlut turin a inbuatsaih nghal. Lehkha a hmuh hun a tlai tawh avangin bànna chu Thawhṭanni-ah thehlut loin, nimin khan a thehlut. Bànna lehkha a thehluh hma hian a pisaah Pathian hnenah inhlanna hun leh inthlahna hun an hmang phawt a ni.

Dr K Beichhua hian a pisa aṭangin Chief Minister Office a pan a, MADC hotu leh Siaha district MNF hruaitu ṭhenkhatte'n an ṭawiawm. Hun eng emaw chen CM a nghah hnuah chawhhnu dar 12:45 velah bànna a thehlut a ni.

Bànna lehkhaah K Beichhua chuan, "Minister of state ka nihna aṭanga bànna i hnena rawn thehlut tura min tih angin, minister of state ka nihna bànna chu ka rawn thehlut e. I mi duhsakna leh chhawmdawl tawhnaah lawmthu ka sawi a, kan Pathian awmpuina leh kaihhruaina duhawm tak chang zel turin duhsakna ka hlan a che," a ti.

Dr K Beichhua hian bànna thehlut tura CMO a pannaah minister official car a hmang a, bànna a thehluh hnua a haw kawngah erawh chuan a mimal car a hmang a ni.

K Beichhua bànna hi CM thuràwn angin Governor chuan a pawm nghal a; Beichhua'n department a enkawl ṭhinte chu enkawltu tur tihfel a nih hma chuan CM-in a enkawl zui rih ang.

Banna a thehluh hnua thuthar thehdarhtute zawhna chhangin K Beichhua chuan, bànna thehlut tura tih a nih chhan sawi tur a hriat loh thu a sawi a, "Hotute thupek awih leh kenkawh ṭhat lutuk hi a lo tawrh theih a nih dawn hi," a ti.

MNF aṭanga a bàn dawn leh dawn loh zawhna chhangin Beichhua chuan, "MNF aṭanga bàn ka la ni lo a, member rinawm tak ka la ni. Ka hma lam hun tur erawh ka sawi lâwk thei lo," a ti a; MLA atana amah thlang tlingtu a bial mipui thu angin kal tura a inngaih thu a sawi.

K BEICHHUA CHANCHIN TAWI
■ Dr K Beichhua (56), Siaha Vaihpi hi medical doctor niin, Mizoram sorkarah a thawk ṭhin a, politics-a a luh hmain a hna aṭangin a báng.
■ Kum 2013-a Mizoram Legislative Assembly inthlanpuiah Saiha bialah MNF candidate a ni a, MLA atan thlan tlin a ni.
■ Kum 2018 inthlanpuiah Saiha bialah thlan tlin leh a ni a, minister of state niin, Social Welfare & Tribal Affairs department, Excise & Narcotics department leh Animal Husbandry & Veterinary department-te a enkawl a ni.