Hmeichhe naupang pawngsualtu Kum 20 chuang táng tura hrem a ni

Champhai District Court-a special judge (POCSO Act) Sylvie Z Ralte chuan, hmeichhe naupang kumtling lo pawngsualtu December 12, Thawhṭannia thiam loh a chantir tawh C Lallianpuia, Champhai Venglai hremna tur chu nimin khan a tichhuak a; kum 20 leh thla khat táng tur leh Rs 20,500 chawi turin a ti.

Special Judge chuan, C Lallianpuia hi Protection of Children from Sexual Offences (POCSO) Act Section 6 leh Indian Penal Code Section 341 hmangin thiam loh a chantir a ni.

POCSO Act Section 6 hmangin kum 20 táng tur leh Rs 20,000 cháwi turin a hrem a, naupang a kal duhnaa hruai loa a hrên beh avangin IPC 341 hmangin thla khat táng tur leh Rs 500 chawi turin a hrem bawk. Pawisa chawi tur chu naupang a khawih chhiat enkawl lailâwkna atan pek tura tih a ni.

C Lallianpuia hian November 26, 2020 tlaiah khan Champhai veng pakhata hmeichhe naupang kum 5 mi chu leilet kama thlám pakhatah a pawngsuala sawi a ni a, Champhai Police Station-ah FIR thehluh a ni.