Ṭiau luia balu leh lung la tawh lo turin Sunshine Overseas Pvt. Ltd hriattir an ni

Geology & Mining director Lalṭhazuala chuan, Sunshine Overseas Pvt.Ltd. chu Ṭiau luia lung leh balu la tawh lo turin a hriattir a; an lo lâk tawh avanga hrem an nih loh chhan tur sawifiah turin a hriattir bawk.

Geology & Mining Director chuan December 12, Thawhṭanni khan Sunshine Overseas Manager hnenah lehkha thawnin, Ṭiau luia lung leh balu an lâk ṭhin chu chawlhsan nghal turin a hriattir a; dan loa lung leh balu an lo lak tawh ṭhin avangin hrem theih an nih thu tarlangin, dan anga hrem an nih loh chhan tur ni 15 chhunga sawifiahna thehlut turin a hriattir nghal a ni.

Ṭiau luia lung leh balute Sunshine Overseas-in dan loa an lak ṭhin chungchangah hian Youth for Environment Justice, Mizoram (YEJM) chuan December 9, 2022 khan Champhai District Magistrate hnenah an zualko a; a thuneihna hmanga a rang thei ang bera titawp turin an ngen.

Youth for Environment Justice, Mizoram tarlan danin, Champhai Zote leh Hnahlan khaw zâwna Tiau luiah balu leh lungte chu VC-te remtihnain Sunshine Overseas-in an la ṭhin.

Phalna pe turin VC-te'n thuneihna an nei lo a, environ-ment/ forest clearance an nei loh bakah, Mizoram Minor Concession Rule 2000 Section 13 an zâwm lo a ni. National Green Tribunal (NGT)-in March 2021-a Enforcement and Monitoring Guidelines for Sand Mining 2020 leh Sand Mining Framework 2018-te an zâwm lo bawk.

Ṭiau luia balu leh lung lak ṭhin a nih avangin luia nungchate tan dam khawchhuah ngaihna a awm lo nia sawiin Youth for Environment Justice chuan, "Ram leilung fa, khawtual mite tan lui nungcha hmanga eizawnna leh kût sa zawn tur pawh a awm tawh lo a, environment thlirna aṭang phei chuan luia balu leh lung lak hi thil rapthlak tàwpkhâwk a ni," an ti.