Sikulah skill development kalpui tum a ni - School Education Minister

School Education minister Lalchhandama Ralte chuan, sikul, elementary stage-ah thiamthil zirna, skill development kalpui tum a nih thu leh kum thar aṭangin sikul ipte ah loh ni siam a nih dawn thu a sawi.

Lalchhandama Ralte hian nimin khan St. Francis of Assisi School, Durtlang Parent's Day a hmanpuinaah thu sawiin, "Zirna sikulah elementary aṭangin skill development kalpui tum a ni a, subject pakhatah telh tum mek a ni. Nakkum aṭang chuan school bag ah loh ní, kum khatah ni 10 aia tam mah hman a, naupangte'n zirlaibu ak loa skill development an zir theihna tur siam a ni dawn a, school routine-ah telh a ni dawn," a ti.

Minister chuan, skill development chu zirlaite'n nun an hman thiam a, thiamthil an neihna tur ang chi an zirna a nih dawn thu te, zirlaite cho phûr thei tur mithiamte thusawi tura sàwmin naupangte fuih phur ṭhin an nih dawn thu te, chutiang tur chuan sorkar a inbuatsaih mek thute a sawi a ni.

Zirna leh hnam nunphung leh zia a kal kawp a ngaih thu sawiin Lalchhandama Ralte chuan, "NEP 2020 duh dan angin, mahni ṭawng uartir a, zirlaibuah pawh mahni hnam zia telna pho lan tum mek a ni. Zirlaibu ennawn mekah Mizo hnam thil ngaihhlutna tur te, Mizo hnam ropuizia naupangte rilruah tuhte pawh a ṭul a, hnam dang ropuizia ngawt zir loin, Mizo hnam ropuizia hi zirlaite'n an hriat a ngai a ni," a ti.

Education Minister chuan, Durtlang khawtlangin zirna lama hma an sawn zel theih nan kum 2023 aṭangin Durtlang Higher Secondary School-ah Science zirmna hawn a nih dawn thu a sawi bawk.

St. Francis of Assisi School Parent's Day-ah hian zirlaite'n zai, làm leh lemchante an entir a; sikula thawkte leh zirlaite bakah, zirlai nu leh pate leh kohhran hruaitute an tel. St. Francis of Assisi School hi kum 1996 khan Catholic kohhranin an din a, pawl 8 thleng zir theihna niin, zirlai 750 an awm mek a ni.