Congress leh PC party-te'n Uniform Civil Code an duh lo

Mizoram Pradesh Congress Committee (MPCC) leh Peoples' Conference (PC) party chuan nimin khan thuchhuah siamin, Uniform Civil Code (UCC) an duh lo thu leh an dodal thu an puang.

MPCC chuan, December 9, 2022-a Rajya Sabha-a UCC pharh remtih a ni chu pawi an tih thu sawiin, "BJP rorelna hnuaiah India rama hnam tênau zawkte, Mizo hnam leh kan Kristianna dinhmun thlengin a derthâwng chho zel. UCC hi India rama Kristiante tana dan sakei a ni dawn a, Mizoram mipuiin kan dodal a ngai," an ti.

India ramah hnam leh sakhaw hrang hrang tam tak awmte'n hnam zia azirin hnam dan (customary law) an nei hrang thliah tih sawiin MPCC chuan, "Mizoramah pawh hnam dan ṭha tak kan nei a, inneih dan, nupa inṭhen dan leh ro khâwm dan leh a dang tam tak kalpui a ni ṭhin. Hnam leh sakhaw hrang hrangte'n kalphung fel tak kan neih ṭhinte hi UCC chuan nuaibo vek a, India ram pumah dan pakhat, inang tlang vek min hmantir a tum a ni," an ti a; UCC chu BJP-in Hindu lalram siam an tumna a ni tih hre turin mipui an chah.

Congress party tarlan danin, UCC chu Parliament-a put luh tumin vawi eng emaw zat BJP-in an bei tawh a, Congress party leh eptu pawl dangte'n an dodal nasat avangin an hlawhchham zel a, tunah erawh chuan private member bill angin an pu lut lui ta a ni. UCC chungchanga vote lak a nih laiin Mizoram Rajya Sabha MP K Vanlalvena chu House-ah a awm lo.

MPCC chuan, December 9 tlai dar 2:30 leh dar 5 inkarah private member bill 'The Uniform Civil Code in India Bill, 2020' sawiho hmasak ber tur a ni tih a hma ni hnih, December 6-a List of Business tih chhuahah chiang taka tarlan a nih avangin Pu K. Vanlalvena hian a hre lâwk vek. Hre lawk chunga UCC dodal tura House-a a awm lo lui hi Mizoram Kristiante tan pawm theih a ni lo a, Kristian sakhua leh Mizorama hnam hrang hrang phatsanna dik tak a ni," an ti.

Congress party hian Mizo hnam leh sakhaw kalphungte humhim turin Mizo mipuiin nasa taka UCC an dodal a ngaih thu sawiin, dan puitlinga siam a nih hmaa theihtawpa dodal turin kohhran, political party leh pawl hrang hrang an sáwm a; MNF party chu BJP thawhpuitu an nih angin, na taka dodal turin an phût bawk.

PC party senior vice president Lalrinzuala Chawngthu pawhin UCC chu an dodal thu leh Mizorama hman ve an remtih dawn loh thu nimin khan a sawi a, "Eptu party - TMC, MDMK, RJD, SP, CPI(M), NCP leh Congress-te'n nasa taka an dodalna kara BJP leh a thawhpuite'n tam hneha Rajya Sabha-a an pass ta hi a pawiin, ram pum tan a him lo hle a ni," a ti.

PC Senior Vice President chuan, Indian Constitution Article 371G-ah Mizoramin special provision a neih avangin UCC chu Mizoramah hmang lo turin tih theih a ni tih sawiin, "Mizoram Assembly remtihna tel lo chuan Mizoramah hman theih a nih loh tur thu a chuang a ni," a ti a; Mizoramah hman a nih loh nan Mizoram sorkarin na taka hma a lak ngei an beisei thu a sawi bawk.