Kut hnathawktute leh mipui tan kan ding dawn - ZPM party

ZPM party chuan thuchhuah siamin, tun hnaiah Mizoram hmun ṭhenkhatah kut hnathawktute beidawn lutuk avanga thil thleng awm zauh zauh chhan bul ber chu sorkarin dan a kenkawh loh vang a nih thu an tarlang a; ZPM chu kut hnathawktute leh mipui tan an din tlat dawn thu an tarlang bawk.

"Tun hnaiah Mizoram hmun ṭhenkhatah kut hnathawktute beidawn luattuk avangin thil thleng a awm zauh zauh a, hei hi a chhan bul berah chuan sorkarin dan a kenkawh loh vang a ni. ZPM chuan kut hnathawktute manganna a ṭawmpuiin pawi a ti tak zet. Mizoram mipui tan ZPM a ding nghet tlat dawn a ni," tiin, ZPM chuan beiseina nung nen kalphung thar, mipui sorkar siam tura inbuatsaih turin kut hnathawktute an chah.

ZPM party chuan, "Mizorama kut hnathawktute hmasawnna atan sorkarin tualchhunga thlai tharte a humhalh a, a hralhna kawng a zawnsak leh a venhimsak a ṭul em em a ni," an ti.

ZPM party chuan, "ZPM hian sorkarna a siam a nih chuan Mizoram mipui tam zawk kut hnathawktute lam na takin a hawi dawn a, policy-ah pawh ngaih pawimawh number one-ah a dah a ni," an ti a; an policy tihchhuah tawhah an hmalak dan tur tlangpui tarlan a nih tawh thu an sawi a ni.