Green Ag hmalakna sawiho a ni

Nimin khan Mamita sorkar hotute leh United Nations aiawha Green Ag hotute'n Green Agriculture Project (Green Ag) hnuaia hmalak dan tur an sawiho a, Green Ag hotute chu Mamit district MJA-te nen an inkâwm bawk.

Ṭhutkhawm kaihruaitu Mamit additional DC Lalfakzuala chuan, Mizoramin ei leh bâra hma a sawn zelna atan leh, ramngaw leh nungcha humhalhna atan Green Ag Project chu nasa taka ṭangkaipui tur a nih thu a sawi.

Meeting-a tarlan danin, Green Ag Project hi Global Environment Facility (GEF) bultum a ni a, UN hnuaia Food & Agriculture Organisation (FAO) leh Mizoram sorkar ṭangkawp hmalakna a ni.

Green Ag Project hmang hian Mizorama kut hna thawka eizawng, a bikin lo nei leh ran vulhtute'n ram leilung chhe zel tur veng chunga eizawnna ngêlnghet an neih theihna tura hmalakna a ni a; kum 2019-2026 chhung atan ruahman niin, cluster parukah ṭhen a ni.

Project kalpuina turin khaw 36 thlan a ni a; kumina rabi season-ah a thawh khatna atan khaw 17-ah hmalak a ni ang.