AMC hnuaia inziak lut lo turin MIMA-in sumdawngte an chah

Mizoram Merchant Association (MIMA) chuan, AMC Licensing Regulation hnuaia inziak lut lo turin sumdawngte an chah.

MIMA chuan, December 12, Thawhṭanni chhunah AMC hotute sumdawng ṭhenkhat hnenah kal a, AMC licence an neih loh avanga ni 10 chhunga insawifiah tura an ti chu an hriatthiam loh thu an tarlang a, "Sumdawngte'n AMC licence an neih loh chhan hi MIMA chuan Mizo hnam himna tur a ngaihtuah avangin sumdawngte in register lo tura a tih vang a ni a, theihtawpin MIMA kan ṭang zel dawn," an ti.

AMC-in insawifiah tura a tih sumdawngte chu insawifiah lo turin MIMA chuan an chah a, "MIMA chu a dinna ngaiah dingin, Mizo hnam himna a awm hma chu AMC-ah in register loh tur a ni," an ti a; hunpui laia chawpchilh taka sumdawngte tihchî-âi chu an ngaihthiam loh thu an tarlang bawk.

MIMA-in AMC Licensing Regulation an duh loh chhan tlangpui chu - Mizo hnam himna a awm loa an ngaih vang te, AMC-in document an phût - voter identity card, residencial certificate, passport size thlalakte chu Mizo ni lo, hnam dang pawhin an nei thei veka an ngaih vang leh, Mizote himna awm lo leh inchîmralna tura an ngaih vang a ni.