KHAWTHLIR
Luinglei khawpuiah Hâlmawi man
Lunglei Police-in hâlpuah leh a kaihhnawih thilte khapna thupek kengkawh tura an din Flying Squad chuan nimin khan Lunglei khawpuiah hâlmawi bâwm 35 leh a neitu an man a, Lunglei Police Station-ah thubuai an ziak lut. Lunglei Police hotute chuan, hâlpuah, hâlmawi, meithallâwn leh silai lem (a mu kap chhuak thei)-te chu sorkarin a khap avangin vài zel a nih dawn thu leh, thupek bawhchhia mante chu dan anga hrem zel an nih dawn thu an tarlang.
NSS-in thisen pe
Baptist Higher Secondary School, Lunglei Serkawn chuan nimin khan an sikulah thisen pek an huaihawt a, Christian Hospital tan thisen unit 47 an pe a, petute mipa 31 leh hmeichhia 16 an ni.
Minister-in hawng
Minister C Lalrinsanga chuan nimin khan C Daruma Memorial Volleyball Running Tournament, December 13-17, 2022 chhunga khelh tur chu Buarpuiah a hawng. Minister chuan, inelnaa tel turte chu rilru thianghlim pu ṭheuh turin a chah. Inelnaah hian Buarpui leh a chhehvel khua aṭangin team 18 an tel a ni.
Film tawi insiamsiak
Information and Public Relations department-in hâlpuah leh hâlmawi khapna chungchanga film tawi insiamsiak a buatsaih result chu December 12, Thawhṭanni khan puan a ni. Intihsiakah hian Nursing School, Lunglei pakhatna a ni a, A Lalmuanchhana leh K Malsawmtluangi, Electric Veng, Aizawlte chu pahnihna niin, New Reign Group, Siaha chu pathumna an ni.
Lehkhabu pahnih tlangzarh a ni
Prof. J Doungel lehkhabu ziah pahnih, 'Evolution of District Council Autonomy in Mizoram' tih leh 'Lai Chieftainship and it's Impact' tihte chu nimin khan Assembly speaker Lalrinliana Sailo-in a tlangzarh. Prof. Chawngkhuma Chawngthu lehkhabu ziah, 'Ram huai ngam loh Krista pasalṭha Thangbawnga' tih chu nimin vêk khan minister Dr R Lalthangliana'n Aizawl Press Club-ah a tlangzarh bawk.
Keilungliah sawiho
Champhai District Committee on Post Completion Management & Maintenance of Dam Reservoir cum Recreation Centre at Keilungliah chu December 12, Thawhṭanni tlaiah khan an chairman James Lalrinchhana, district bawrhsap hoin tuikhuah kamah an ṭhukhawm. Keilungliah tuikhuah enkawl dan tur an sawiho a; tuikhuah tlawhtute chu faina ngai pawimawh turin an ngen a ni.
Deputy Speaker-in Sub-station hawng
Assembly deputy speaker Lalrinawma chuan December 12, Thawhṭanni khan a biala Tlungvelah power 1.6 MVA, 33/11KV Station a hawng. Power sub station hi SEDP aṭanga Mizoram sorkarin sum a ruahman nuai 160 hmanga thawh a ni a, March 2020-ah siam ṭan niin, March 26, 2021-ah zawh a ni.
Kawng siam dawn
PWD-in Vaivakawn kawng pengṭhuama pipe phûmnaah December 12-14, 2022 chhungin zan dar 7 aṭanga a tûk zing dar 5 thleng kawng an siam dawn a, hei vang hian kawngpui chanve khâr a ni. Hunthar Veng lei tlahniam chhehvel pawh naktuk aṭangin thawm ṭhat a ni dawn a, hna thawh chhungin kawng chanve khâr a ni dawn. Traffic SP Rodingliana Chawngthu chuan, hnathawh tibuai theia lirthei leh bungrua dah phal loh a nih thu a tarlang.
Waiting shed hawng
AMC Ward-III corporator C Lalchhandami chuan Model English Medium Primary School, Ramhlun North-a zirlai nu leh pate'n an fate an nghah laia an chawlhna tur waiting shed pahnih a hawng. Waiting shed-te hi AMC Property Tax Return 2022-23 sum Rs 66,000 hmanga siam a ni. C Lalchhandami hian a bial chhunga Aizawl North College Principal hnenah water cooler a hlan a; chhungkaw 15 leh sikul pathum tan in chung tur rangva bundle 38 a sem bawk.