Mizoram PWD E-in-C hlui pahnihin Eirûk thubuaiah thiam loh an chang

PWD engineer-in-chief hlui pahnih - Liansanga, Khatla leh Lianchungnunga, Chaltlang te chu Serkhan-Bagha Road siamnaa sum tam tham tak tihchingpen thubuaiah Special Court (Preven­tion of Corruption Act)-in nimin khan thiam loh a chantir a, nimin vêk khan jail-ah dah luh an ni. Anmahni hrem dan tur chu vawiinah puan a ni ang.

Serkhan-Bagha Road siamnaa sum tihchingpen thubuaiah hian special judge (PC Act) Dr HTC Lalrinchhana chuan nimin khan thutlukna siamin, court thuremna a puang a; PWD hotu hlui Liansanga s/o Suakkunga leh Lianchungnunga s/o Hrangaia te chu Indian Penal Code (IPC) Section 420 leh 120B bakah, PC Act, 1988 Section 13(2) [Section 13(1)(c)&(d) telin] hmangin thiam loh a chantir a ni.

Sum tihchingpennaa inhnam­hnawiha puh dang PWD assistant/accountant B Lalthanpuia s/o B Lalnghaka, Upper Republic erawh chu finfiahna ṭha tâwk a awm loh avangin chhuah zalen a ni thung.

IPC Section 420 chu hlâwkna atana mi bum thubuai niin, kum sarih thleng tàntir theihna a ni a, dana a inziah dan chuan, bail theih loh a ni. PC Act Section 13(2) chu sorkar hnathawk thil sual tite chungchang niin, kum khat aia tlem lo, kum sarih thleng tàntir leh pawisa chawi tura hrem theih a ni.

Judgement order-a tarlan danin, Serkhan-Bagha kawngpui siam­naah sum eirûk a awm nia ngaiin Hmarphei Zirlai Pawl president ṭhin B Lalṭanpuia chu kum 2009 khan Anti Corruption Bureau-ah a zualko a; thubuai ziah luh a nih hnuah an chhui zui a ni.

12th Finance Commission chuan kum 2007-08 chhunga kawngpui siam leh lei dawhna atan Mizoram sorkarah cheng nuai 1,053 a pe a; chuta ṭang chuan chutih laia E-in-C Liansanga'n chief engineer (Highways) Lianchungnunga hnenah Serkhan-Bagha Road siamna tur cheng nuai 175 a pe chhuak a ni. Lianchungnunga'n Kolasib-a PWD executive engineer (EE) hnenah nuai 155 a pe a, nuai 20 chu remchang danga pek leh turin a kawl thung.

Lianchungnunga chuan Mual­khang-Hortoki kawng siamna tur sum Rs 87,67,147 chu Serkhan-Bagha Road atan sawnin, EE, Kolasib hnenah a pe leh a; Serkhan-Bagha siamna atana EE, Kolasib kuta sum dah zawng zawng chu Rs 2,42,67,147 a ni.

Mualkhang-Hortoki kawng siamna tur sum pawhpên Rs 87,67,147 chu EE, Kolasib chuan Lianchungnunga hnenah March 31, 2008-ah a pe lêt. Lianchungnunga'n a hmaa nuai 20 a kawl sa leh Kolasib EE aṭanga a dawn Rs 87,67,147, a vaiin Rs 1,07,25,000 chu E-in-C Lian­sanga hnenah a pe let a; mahse, a kutah Rs 42,147 a bothlau thung.

Hetih lai hian, Accountant General report-ah, 12th FC-in Mizoram PWD hnena kum 2007-08 chunga pawisa a pek aṭanga Serkhan-Bagha Road siamna tura ruahman chu a bo a bâng awm loa hman zawh vek a nih thu tarlan a ni a; hei vang hian E-in-C Liansanga chu cheng nuai 107.25 eirûa ngaih a ni.

Sum pawhpên cheng nuai 260.81 zinga nuai 182.55 chu a hmanna hriat lohin a awm zui a; chumi kaihhnawihah chuan PWD assistant/accountant B Lalthan­puia'n cheng nuai 182.55 hmanna document lem a siam chawp bakah, mi signature a siam chawp nia hriat a ni a, chuvang chuan a lakah thubuai ziah luh a ni.
Liansanga chu cheng 107.25 eirûk leh thuneihna hman sual bakah, Serkhan-Bagha kawng siamna tur sum dil chhuah a nihna anga hman loh avangin thubuai siamsak a ni a; Lianchungnunga chu Rs 42,147 eirûk leh cheng nuai 20 a pek chhuah loh vanga kîr (lapse) chungchanga thu dik lo (fabricated false information) ACB hnena hrilh avangin thubuai siamsak a ni bawk.
Liansanga, Lian­chungnunga leh B Lalthanpuia te lakah IPC section pali - 120B, 420, 468 leh 477A leh, PC Act Section 13(2) tlawhchhanin thu­buai ziah luh a ni a; B Lalthanpuia chu finfiahna ṭhat tâwk loh vanga chhuah zalen a nih laiin, Liansanga leh Lianchungnunga te chu Section 120B/420 leh PC Act Section 13(2) [Section 13(1)(c)(d) telin] hmangin thiam loh chantir an ni ta a ni.
Liansanga hi Kau-Tlabung Mini Hydel Project leh Tuipanglui Mini Hydel Project siamnaa sum tihchingpen thubuaiah December 7, 2022 khan thiam loh chantir a lo ni tawh bawk a, kum hnih chhung táng tur leh Rs 15,00,000 chawi tura hrem a lo ni tawh a ni.