Supply kudam thar sakna tur enfiah

Chief minister Zoram­thanga, Food, Civil Supplies and Consumer Affairs (FCSCA) minister K Lalrinliana leh FCSCA department hotute chuan, nimin zing khan Sairangah Supply kudam sawnna tur hmun remchang an enfiah.

Sorkar thuchhuah tarlan danin, Muanna Venga FCSCA kudam chu Sairang lamah sawn tum a ni a; mi 11-in kudam sawnna tur ram remchang an neih thu sorkarah an thehlut a ni. Mi 11-te ram chu nimin zing khan Chief Minister hoin enfiah a ni a; kudam atana hmun remchang nia ngaih mi palite ram chu uluk zawka ennawn leh tura thlan a ni.

Sairang lama Supply kudam thar siam turah buhfai quintal 30,000 leng tur kudam bakah, thawktute chenna tur (staff quarters), lirthei hûnna leh inher remna tur bakah, pawimawh dangte tel thei tura ruahman a ni.

CM Zoramthanga hian nimin zing vêk khan Sairanga FCI kudam sak mek a tlawh bawk a; kudam chu Sairanga rél kawng aṭanga awlsam têa buhfai dah khawm theihna tur niin, buhfai quintal 1,00,000 dawng tura ruahman ni.