Kuhva phur lirthei Bilkhawthlirah an châng Kudam-a an hmuh kuhva rah ip 120 an hal ral

Myanmar aṭanga dan loa lak luh kuhva rah phurte'n Bilkhawthlir an paltlang lohna turin Kuhva Chingtu Cooperative Society Ltd., (KCCS), Bilkhawthlir chuan nimin aṭang khan chhun leh zan, englai pawha duty an ṭan a; nimin vêk khan kuhva rah ip 120 vel an hâl.

Kuhva phur lirtheite chânga endik tur hian KCCS member-te chu national highway-a Chemphai péng leh buhchang péngah an duty a; chhun zan zawma duty tur an nih angin, nizan lamah pawh mi eng emaw zatin an riah chilh. Zana riah chilhtu tur hi mi 50 vel an tlin theih an inbeisei thu Vanlal­hmuaka chuan a sawi.

Vanlalhmuaka chuan, kuhva rah phur nia an rinhlelh lirthei apiang an endik dawn tih sawiin, "Dan loa tawlh rûk kuhva rah phurte chu kan man ang a, an kuhva rah phurh­ te kan hâl zel ang," a ti. Niminah pawh khan kudam pakhata kuhva rah ip 120 vel an hâl tih a sawi bawk.

KCCS, Bilkhawthlir Secretary sawi danin, NH kawngpui aṭanga Chemphai péng kawng hian Bagha a pawh a, Buhchang lama péng kawngin Zamuang lam a pawh thung a; chu'ng kawng pahnihte chu NH kawngpui hêlna atan an hmang ṭhin nia hriat a ni.

Vanlalhmuaka chuan, Bilkhawthlir leh a chhehvelah kudam eng emaw zat a awm tih sawiin, chu'ngte chu Myanmar lam aṭanga dan loa lak luh kuhva rah dah khawmna atan hman a ni tih a sawi a; Bilkhawthlir khaw chhung bikah pawh kudam panga vel a awm tih a sawi bawk.

KCCS, Bilkhawthlir Secretary sawi danin, Bilkhawthlir khuaah hian chhungkua 1,100 vel an awm a, chu'ng zinga chhung­kua 800 vel chu kuhva chíng an ni. Kumina kuhva rah an tharte chu vaiin an lei vek tawh a, mahse, state páwnah an phur chhuak thei lo thung.