Naupang pan châk nih tum rawh u - Chhandama

Mizoram Middle School Teachers Association (MSTA) chuan nimin khan Synod Conference Centre-ah in-khawmpui an hmang a, khuallian Lalchhan­dama Ralte, School Education minister chuan, zirtirtute chu naupangin an pan châk sikul nih tum turin a chah.

MSTA inkhawmpui hi an president Rosangzuala Ralte-in a kaihruai a; Minister chuan, "Sikulah naupang lut an tlem chuan thawktute mawh a ni. Chuvangin, zirtirtute'n an sikul chu nu leh pain an rin ngam, naupangin an pan a nih theih nan ṭan an lâk a ngai," a ti.

Lalchhandama Ralte chuan, zirtirtute chu khaw­tlang leh kohhrante nen thawhhona ṭha nei tura chahin, "Mipuiin sorkar sikula rinna an nghah theih nana ṭan lak a ṭul," a ti a; zirlai tam zawk nei a, mite bawm tlak rimtui chhuah turin a chah a ni.

Zirtirtu chu hna zahawm a nih thu sawiin Minister chuan, "A zahawmna kenkawh kawngah ṭan lak thar a ṭul. Zirtirtute tih atana mawi leh mawi lote ngaihtuah a, ṭawngkam leh incheina thlenga inuluk lehzual a ngai a ni," a ti bawk.