KHAWTHLIR
NSS-in thisen pe
Zemabawk Higher Secondary School NSS unit chuan nimin khan an sikulah Civil Hospital, Aizawl tan thisen unit 85 an pe a, petute mipa 52 leh hmeichhia 33 an ni. Mizoram Institute of Comprehensive Education (MICE) NSS pawhin nimin khan Civil Hospital, Aizawl blood bank-ah thisen unit 23 an pe a, petute mipa 21 leh hmeichhia pahnih an ni. Lawngtlaia Region HSS NSS unit pawhin blood donation camp huaihawtin, mipa 44 leh hmeichhia 20-te'n District Hospital tan thisen unit 64 an pe bawk.
FES an lâwm
Fire & Emergency Services chuan thuchhuah siamin, tun hnaia Aizawl leh hmun ṭhenkhata kângmei chhuakah PHE, Police, Traffic Police, CRPF, mimal tui zuarte leh mipui ṭawiawmna leh inpekna an dawng nasa ṭhin tih an tarlang a, "Hetianga vanduaina a thlen chánga thawhhona ṭha tak kan hmuh ṭhin avangin FES chuan lawmthu a sawi tak meuh a, hun lo kal leh zel turah pawh thawhhona ṭha tak a awm zel kan beisei," an ti.
Page hack vangin FIR thehlut
Congress ṭhalai president Dr Lalmalsawma Nghaka Facebook page chu tihbuai (hack) a ni a, hei vang hian nimin khan MPYCC chuan Cyber Crime Police Station-ah FIR an thehlut. MPYCC tarlan danin, Dr Lalmalsawma Nghaka Facebook page hi November 2022 tìr khan hack a ni a, a tibuaitute'n thlalak leh thu an post ṭhin. Dr Lalmalsawma chuan, page khawihtute'n an duh duh an dah a, politics thila inbeihna leh intihhmingchhiat theihna a nih avangin page-a post-te chu ama tih a ni lo tih hre turin mipui a chah a ni.
Puanthui khawl sem
Chief minister Zoramthanga chuan nimin khan a bial, Aizawl East-I chhunga Ṭhuampui, Falkland Veng, Zemabawk, Zemabawk North, Berawlui, Bungbangla, Tuirial leh Tuirial Airfield Venga Covid-19 vanga khawsak harsat chhungkaw 142 hnenah puanṭhui khawl a sem. Puanṭhui khawl hi MLA fund Rs 12,00,000 hmanga lei a ni.
MUP-te thilpek pe
Nimin khan Armed Veng community centre-ah Aizawl East-II bialtu MLA Robert Romawia Royte, minister of state chuan a bial chhunga MUP member 1,800 te Krismas thilpek atan dinner set a pe. Robert Romawia chuan kum upate chu chhungkua, khawtlang, Kohhran, ram leh hnam tan an hlu tih sawiin, "Mi changkang apiangin an hlutna hi an hriain an zah thiam ṭhin a ni," a ti.
Minister-in hall hawng
Minister of state Lalruatkima chuan December 13, Thawhlehni zan khan Kawnpui Hmarveng YMA Hall thar a hawng. Hall hi NEDP sum Rs 5,00,000 hmangin kum 2018-ah sak ṭan a ni a, kum 2020-ah RD department kaltlanga Rs 8,00,000 hmuh hmanga sak chhunzawm niin, a hnuah DRDA aṭangin Rs 7,00,000 hmuh leh a ni bawk.