Hlawh lâkna atan chauha sorkar hna ngai lo turin Dy. CM-in MSSA a chah

Mizoram Secretariat Service Association (MSSA) chuan nimin khan Aijal Club-ah General Conference vawi 17-na an hmang a, deputy chief minister Tawnluia'n a hmanpui. Tawnluia chuan, sorkar hna chu hlawh lâkna atan chauha ngai lo turin a chah.

Deputy Chief Minister chuan, sorkar hna chu hlawh lâkna atan chauha ngai lo a, mahni invawnnaah te, hun vawn dikah te, mahni inthununnaahte hnain a phût anga awm turin MSSA member-te a chah a, "Mipui tana rawngbawl in ni tih in hre reng tur ang che u. Mipui, a bik takin thingtlang lam aṭanga dawr tura lo kalte dimdawi a, ṭha taka lo dawnsawn tur a ni," a ti.

MSSA member-te chu sorkar inrêlbàwlna hrang hranga a nghaktu an nih thu sawiin Tawnluia chuan, sorkar neitu an nih anga ṭhahnemngai taka thawk turin a chah a, "Ramin hma a sawn zel nan in ngaihtuahna séngin, harsatna leh thil dang a awm pawhin tuar hram hram ula, thinglung paukauh tak nei ang che u," a ti a; sorkar finchhuaha ṭawiawmtu ni tur leh an hnaah inpe turin chah bawk.

MSSA inkhawmpuiah hian an member thi an sûn bakah, member thar lawm luhna leh kai sangte lawmpuina hun an hmang a, chawhnuah ro an rél a ni.