Assembly Speaker-in hall a hawng

Assembly speaker Lalrinliana Sailo chuan nimin khan Sesawngah Shyama Prasad Mukherji Rurban Mission (SPRM) leh MGNREGS kal kawptir aṭanga sak Sesawng VC-III community hall a hawng. Speaker chuan, mipuite khai chhuahna atan SEDP chu changtlung zawka kalpui zel a ni dawn tih a sawi. Hall hi cheng nuai 36 sénga sak a ni.

Lalrinliana Sailo chuan, khawtlang mipui duhna leh mamawhna hre chungin hmasawnna kawng zawh zel a nih tur thu sawiin, "Harsatnate'n sorkar tibuai mah se, mipui khai chhuahna atan SEDP changtlung zawka kalpui zel a ni dawn. Daido aṭanga Mizoram leh Manipur inrinna thlenga inkalpawhna kawngpui ṭha zawk siam nan cheng vbc. 33 pawm a ni," a ti.

Assembly Speaker chuan, aia upa zahna, kohhran zahawmna leh hlutnate bakah, tlawmngai pawlte ṭhahnemngaihna leh inpumkhatna atana hmalaknate tiṭhuanawp zawnga chêtna lakah inthiar­fihlim turin kal khawmte a chah a ni.

Inkhawma khualzahawm Lalruat­kima, Rural Development minister pawhin thu sawiin, khawvel hmasawn­nain rualawhna ṭha a hring tih sawiin, "Khawpuia hmasawnna ruhrel angte thingtlang mite'n an neih ve theihna turin Aibawk RD block leh Thingsulthliah RD block-ahte SPRM kalpui a ni," a ti a; India rama SPRM kalpuina cluster 300 zingah Mizoram chu thawk ṭha ber dawttu a nih thu a sawi.

Speaker leh Minister hi Rural Development department leh Thing­sulthliah RD block-a thawkte'n an ṭawiawm a ni.