UPSC Main-a tlingte kâwm

UPSC Civil Services Main Examination paltlangtu pahnih - KC Zalena s/o KC Lalduhsanga leh Betty Lalrinfeli d/o Rev.Dr B Lalramhluna te chu nimin khan Mizoram Youth Commission chairman Dr Vanlalṭanpuia, MLA-in a pisaah a kâwm a; Mizoram sorkar aiawhin lawmpuina a hlan bakah, interview an hmachawn turah tling ngei turin duhsakna a hlân.

Dr Vanlalṭanpuia chuan, UPSC Civil Services-ah hun eng emaw ti hnua interview tura inziak tling an awm leh ta chu MYC-in an ngaihhlut thu sawiin, interview an hmachawn turah sorkarin a theih ang angah puih a tum thu a sawi a; interview an hmachhawnna tura an mamawhte sorkar aṭangin a ṭul anga hmalakpui an nih tur thu a sawi bawk.

KC Zalena leh Betty Lalrinfeli te hi kumina MPSC Combined Competitive Examination-ah an tling ve ve bawk a; KC Zalena hi Aizawlah SDC-in a awm mek a, Betty Lalrinfeli hi Hnahthialah SDC-in a awm mek a ni.

MYC hotute sawi danin, tun din hmunah Mizo zingah IAS pariat, IPS pakhat, IFS pathum, IAAS pahnih, ICAS pathum, IDAS pahnih leh IES pahnih an awm mek a ni.