Aizawl Bypass Road-in a paltlang turah Ram pass siam leh kutthlak phal a ni lo

Aizawl Bypass Road leh chumiin a ken tel lei verh tur chung­chang­ah Land Revenue & Settlement (LRS) department chuan, kawng­pui a paltlang tur ram/ hmunah pass khawih chêt phal a ni lo tih hriattirna, December 8, 2022 khan a chhuah.

LRS department noti­fication-a tarlan danin, Two laning of Aizawl Bypass including Tunnel (Connecting Sairang on NH-06 to NH-02) kawng­pui siam tumin a paltlang tur ramah kutthlak phal a ni lo a, ram pass dilna leh ram ṭhen dilnate chu khawih phal a ni lo.

Notification chhuah hmaa ram teh fel tawh, thawktu indaih lohna vanga pass la tihchhuah lohte leh temporary pass tihnun dilnate erawh chu thla nga chhunga chinfel phal a ni thung.

Revenue minister Lalruatkima chuan Vanglaini palai zawhna chhángin, ram lâk turah hamṭhatna leh hlawkna beiseia LSC siamte an awm ṭhin a, chuvang chuan ram khawih chet theih loa dah phawt a ngai tih a sawi a, "Land freezing order a ni ber a, nakinah DC-in preliminary notification a chhuah ve leh ang," a ti a; sorkar hmalakna chu hmasawnna a nih avangin lawmawm a tih thu leh, kawngpui siam leh lei verh tak tak tur chuan hun a duh dawn thu a sawi.

LRS department-in hriattirna a chhuah chung­chang hi chief minister Zoramthanga chuan Instagram-ah a tarlang a, "Pathian khawngaihna leh awmpuinate nen he hmachhawp pawimawh tak hi kan tihhlawhtlin thuai ka beisei. Mizorama hmasawnna project tamtak tiṭhuanawp ṭhintu compensation leh land acquisition kaihhnawih buainate avanga hun kan khawhral tam lohna tura kan Governor zahawm tak leh Revenue department-te'n hetiang ruahmanna ṭha tak mai an duang hi ka lawm tak zet," a ti.