Thlámah 3 kâng hlum

December 13, Thawhleni zan dar 9:30 vel khan Dilzau rama thing zaia in hlawh mi pathum chu thlámah an kâng hlum. Dilzau ram hi Kolasib district-a Hortoki VC huam chhunga awm a ni.

Vanglaini thu dawn danin, Vanlalpeka (45) leh a nupui Lallawmawmi, Ordein-a (45) leh Kungtea (33), Meidum khaw mi vekte chu thing zaia inhlawhin Dilzaua ramah an riak a; December 13 zan khan thlám chhungah thing an zaina kháwla oil (2T) an thun laiin kângmei a chhuak a ni.

Kângmei chhuah lai hian Lallawmawmi chu páwna tui ina a chhuah lai a ni a, ṭanpuitu tur zawngin an thlám aṭanga thlám dang hnai ber a pan nghal a; a mi punte nen an thlám an thlen leh chuan an lo kâng hlum vek tawh a ni.

Mi pathumte ruang chu Bairabi damdawi-inah endik a ni a, nimin khan vui an ni.