Covid-19 vei kan nei rih loa a lan laiin thlamuan sual a hlauhawm - Health Minister

Nimina Home minister Lal­­chamliana nen quarantine centre hrang hrang an tlawhnaah Dr R Lalthangliana chuan, Covid-19 vei tamna hmun aṭanga Mizorama haw tur an tam avang­in fimkhur hle a ṭul thu a sawi a, "Kan fimkhur loh chuan sorkar, NGO, task force bakah, mipuite'n hah leh rim taka hun eng emaw chen kan lo beih ve ṭâng ṭângna hi zan khat thil thu-ah kan tichhe vek thei a, sorkarin tih tur leh tih loh tur a tihte mipuite'n ṭha taka an zawm a pawimawh," a ti.

Health Minister chuan, Mizo­rama rawn haw turte chu a tahtawlin hruai haw an ngai dawn tih sawiin, "Kan inseng luh kim a, quarantine an zawh vek hnuah kan dinhmun dik tak a hriat chian theih dawn a, hemi chhung hian mipui kan fimkhur lehzual a ngai dawn. Mizoram mi leh sa, state páwna tangkhang rawn haw turte hisâp aia an tam avangin quarantine centre pawh a hautak hle a ni," a ti a; dawhthei tak leh thuawih taka ṭang zel turin mipui a ngen.

Home minister Lalchamliana chuan, tangkhang Mizorama rawn haw tur sing khat dáwn an awm thu sawiin, "Tangkhang lo hawte enkawlna atan sorkarin sum a sên belh hnem dawn. Rapid Antibody Test (RAT) kit hi pakhat Rs. 700 man a ni a, mi pakhat tan vawi hnih test zel a ngai dawn. Mi tlawmngai leh thilphalte zarah eng emaw chen harsatna tâwk loin kan la awm thei a ni," a ti.

Home Minister sawi danin, rawn hawte chu ni 14 chhung khung hran an nih chhungin mi pakhat tan ni tin ei leh in manah sorkarin Rs. 300 a séng dawn a; an mutbu leh mamawh ṭhenkhat - hrûkpuan, ha nawhna, ha hlo leh a dangte pawh a thlawna pek an ni ang.

Quarantine centre pakhat - R Dengṭhuama Hall chu a chung a far nasat avangin khung hran mekte'n harsatna an tâwk tih a viltute'n an sawi a; Lalchamliana chuan, a rang lama silpauline-a khuh turin thuneitute a hrilh nghal.

Sorkar thuchhuah tarlan danin, quarantine centre hi medical team ruat bikte'n an vil reng a, ni tin thermal screening tihsakin, damdawi mamawhte a theih ang angin a thlàwna pek a ni a, ṭhenkhat chu an chhungte'n security duty kaltlangin an pe ṭhin. Quarantine centre-a awmte an chhuah hnuah an mutbute chu tihthianghlim (sanitise) zel a ni a, Aizawl Municipal Corporation lamin ni khat kar danah an hnawmhnawkte an paih ṭhin bawk.