March 1, 2023 aṭangin satel helmet khum phal dawn lo

Aizawl Traffic SP Rodingliana Chawngthu chuan, Mizoramah satel helmet khum phal a nih loh thu a tarlang a; March 1, 2023 aṭangin helmet chungchangah khauh lehzuala dan lekkawh a nih dawn thu a tarlang.

Traffic SP chuan, Supreme Court Committee on Road Safety thupek Ministry of Road Transport & Highways aṭanga hmuh leh Motor Vehicles Act, 1988 Section 129-in a sawi angin, two wheeler khalhtute’n helmet him leh rintlak an khum a ngaih thu a tarlang a, "A siam dan leh nihphungah Bureau of Indian Standards (BIS)-in a pawm chin leh a tlukpui helmet ṭha leh him chin chauh khum tur a ni. Mizorama kan hman lâr satel helmet kan tihte hi BIS pha lo a nih avangin khum phal a ni lo," a ti.

Two wheeler-a chesual zingah BIS pha lo helmet khum vanga thi an awm fo nia tarlangin Traffic SP chuan, Supreme Court hnuaia Committee thupek leh MV Act-te chu March 1, 2023 aṭangin khauh lehzuala kenkawh a nih dawn thu a puang a; harsatna an tawh loh nan leh an himna tur a nih avangin inhmakhua lâwk turin two wheeler khalhtute a chah a ni.