UCC a tàwp thlengin kan dodal dawn - MNF Ṭhalai

MNF ṭhalaite chuan thuchhuah siamin, Uniform Civil Code (UCC) chu MNF party-in an thláwp lo niin an tarlang a; UCC Bill pawm a nih loh nan a tàwp thlengin an dodal dawn niin an sawi.

MNYF chuan, Rajya Sabha thlasik ṭhutkawma December 9, 2022-a Rajasthan BJP MP Kirodi Lal Meena-in private member bill, 'The Uniform Civil Code in India Bill, 2020' a put luh chungchangah, "MNF chuan Mizote hnama min dintu Pathian ṭih leh ráwn chunga Mizoram leh a chhunga chêng mipui rawngbawl hi a tum a nih avangin, heng mite nena ngháwngkawl bah dun rem a ti ngai dawn lo a ni," an ti.

UCC Bill chu put luh a la ni chauh a, pawm (pass) a la lo tih sawiin MNYF chuan, "Mizorama political party ṭhenkhatte'n Mizo mipui rilru hruai sual thei zawnga thu an thehdarh nghal hi pawi kan ti hle. Bill hi Rajya Sabha-ah sawiho tura put luh chauh a la ni a, pass a la ni lo," an ti a; UCC Bill chungchangah Congress party-in Rajya Sabha MP K Vanlalvena thu dik tâwk lo hmangin an bei nghal nia sawiin, pawi an tih thu an tarlang.

MNF hmalakna avangin Indian Constitution-a Article 371-G ah Mizoram tan bik inhumhimna tur siam a nih thu sawiin MNYF chuan, "UCC Bill, 2020 chungchangah phei chuan Mizoram tan hlauh tur awmin kan hre lo," an ti a; Constitution-ah Mizote himna tur ziah a nih thu an tarlang a ni.