Liansanga leh Lianchungnunga hremna puang Kum 5 leh kum 4 táng tura hrem an ni

Special Court (Pre­vention of Corruption Act) chuan PWD engi­neer-in-chief hlui pahnih Liansanga leh Lian­­chungnunga te hrem­­na nimin khan a tichhuak. Liansanga chu kum 5 chhung táng tur leh Rs 40,00,000 chawi tura a hrem a ni a, Lian­chung­nunga chu kum 4 chhung táng tur leh Rs 20,00,000 chawi tura hrem a ni thung.

Liansanga leh Lian­chungnunga te hremna nimina puan a nih hmain an pahnih hian an ukilte nen Special Court-ah an inlan a; an ukilte chuan, an upat tawh avang leh an hriselna dinhmun avangin a na lo thei ang bera hrem a, kum khat chhung bak tàntir lo turin special judge Dr HTC Lalrin­chhana an ngen a ni.

Sorkar ukilte erawh chuan, Liansanga chu kum 6 chhung tàntir turin leh Lianchungnunga chu kum 5 tàntir tura an ngen bakah, cheng nuai 60 ve ve chawitir turin Special Judge an ngen thung.

Ukilte thusawi a ngaih­thlak hnuah Special Judge hian darkar chanve vel inngaihtuahna hun a hmang a, chumi hnuah a thutlukna a puang.

Liansanga hi puh a nihna pahnihah kum 5 chhung ve ve táng tur leh cheng nuai 20 ve ve chawi turin a hrem a; jail-a a tàn hun tur bik chu sorkar hnathawk pension tawh, kum upa tawh, a thil tihsual ang ti nawn thei tawh lo a nih avangin concurrent-in a kaltir a, hun khatah tlâk turin a ti a ni.

Jail tàn hun tur concurrent-a kaltir a nih avang hian Liansang hi kum 5 táng tur leh cheng nuai 40 chawi tura hrem a ni tihna a ni a; cheng nuai 40 a cháwi lo a nih chuan kum 20 chhung tàn belh tura tih a ni bawk.

Lianchungnunga pawh puh a nihna pahnihah kum 4 chhung táng tur leh cheng nuai 10 ve ve chawi tura hrem a ni. Ani pawh hi sorkar hnathawk pension tawh, kum upa tawh, a thil tihsual ang ti nawn thei tawh lo tur a nih avangin concurrent-a kaltir a ni.

Lianchungnunga hi Special Court chuan kum 4 jail táng tur leh cheng nuai 20 chawi turin a hrem tihna a ni a; cheng nuai 20 a chawi lo a nih chuan kum 10 dang tàn belh turin a ti bawk.

Liansanga leh Lianchungnunga te court-in thiam loh a chantir ní, December 14, Nilaini khan jail-ah dah luh nghal an ni a; nimina court-a an inlan hnuah court lock up-ah dah niin, táng dang rualin tlaiah jail panpui leh an ni.

Ukilte hnen aṭanga Vanglaini thu dawn danin, Liansanga leh Lianchungnunga hi kum 2 aia rei táng tura hrem an nih avangin Special Court hnenah bail an dil thei lo a, bail an dil duh a nih chuan Gauhati High Court, Aizawl Bench-ah an dil a ngai.

Tarlan tawh angin, Serkhan-Bagha Road siamnaah sum tihchingpen a awm nia ngaiin Hmarphei Zirlai Pawl chuan an president B Vanlaltana hmingin November 3, 2009-ah Anti Corruption Bureau (ACB)-ah complaint an thehlut a, ACB-in thubuai ziak lutin, an chhui zui a; hun eng emaw chen court-ah ngaihtuah a nih hnuah PWD E-in-C hlui pahnih Liansanga leh Lianchungnunga te chu thiam loh chantir an ni ta a ni.

Thubuaia hming lang dang, PWD assistant/accountant B Lalthanpuia erawh chu finfiahna ṭha tàwk a awm loh avangin chhuah zalen a ni thung.