Covid-19 laka invènna hlamchhiaha sum buaipui lutuk a hlauhawm - ZPM

Zoram Peoples' Movement (ZPM) party chuan nimin khan thuchhuah siamin, Covid-19 hripui kái lo tura mipui inven fimkhurna lam hlamchhiahin sum lam buaipui lutuk hlauhawm an tih thu an tarlang a; India ram chhung rila tangkhang Mizo eng emaw zat an rawn haw dawn avangin sorkar thu zâwm hrâm turin mipui an ngen.

ZPM party tarlan danin, Assembly Speaker hoa legislature party aiawhte May 7, 2020-a ṭhukhawmin Covid-19 dona leh invenna atan MLA-te Local Area Development (LAD) fund kum khat atan cheng nuai 150 an neih aṭangin nuai 50 ṭheuh pawh ṭhen a, CM Relief Fund-a thawh an rél a; MLA 40-te thawh khawm tur zat chu cheng nuai 2,000 a ni.

MLA-te'n an thla tin hlawh (basic pay) aṭangin 30% (Rs. 24,000) thla riat chhung thawh turin an rél bawk a, belhkhawmin thla tin Rs. 9,60,000 a ni ang a, thla riatah chuan Rs. 76,80,000 a ni ang. MLA fund leh thlabi hlawh aṭanga MLA-te'n sum an thawh tur zat chu nuai 2,076.8 a tling.

Covid-19 kai lo tura mipui vèn fimkhurna lam hlamchhiaha sum lama buaipui lutuk a hlauh­awma an hriat thu sawiin ZPM chuan, "Mahni party policy tihhlawhtlin tumna remchang kan melh palh ang tih a hlauhawm tak zetah kan ngai," an ti a; a hmanna tur duan lâwk awm loa sum thawh khawm ai chuan, MLA-te fund chu mi harsate'n an khuaa inhlawhna atan hman theih tura dah ni se, CM Relief Fund-a chhûn luh tura pawh hêk kher loh a ṭha zawka an ngaih thu an sawi.

ZPM party tarlan danin, Mizo ṭhalai tlawmngai ṭhahnem tak ruahthimpui hnuaiah bûk khâwr chawpin ramri an véng mek a, khawpuia awmte'n chawhmeh an nghei hlauin thingtlanga kut hnathawktute'n an thlai tharte a thlawnin an pe a, khawpuia mite pawhin thingtlang lamin hmuihmer an nghei hlauin thilpek phurin an feh chhuak chum chum a ni. Sorkar a thlaphâng ang tih hlauin mi ṭha-hnemngaite'n CM Relief Fund-ah cheng maktaduai télin an pe bawk.

Covid-19 do nan MLA-te'n sum tam tham tak thawh an rèl tawh a, sorkar hnathawkte pawh rem lo chungin an hlawh aṭanga sum thawhtir dan kawng dap a nih thu sawiin ZPM chuan, "Hetih laia sum báwm vawngtu Chief Minister leh Finance Minister berin sum awm zat leh chêt vel dan a zêp tlat a nih chuan, Covid-19 léng hmanga sum khawn a, party policy project eng eng emaw thawh rûk tumna a awm a hlauhthawnawm ta hial mai," an ti.

ZPM chuan state páwn­a Mizo tangkhang ṭhahnem tak Mizoramah an lo haw khâwm dawn tih sawiin, "Tam tak chu red zone-a mite an ni dawn a, a hma zawng aia kan fimkhur tlân a ngai dawnin a lang," an ti a; hripui laka fimkhurna thilah sorkar thu zâwm hrâm turin mipui an chah a ni.